Durante eleccion reciente un partido politico grandi a ricibi Afl. 10 miyon pa su campaña electoral di parti di un empresa financiero importante pa medio di fundacion Klaas Vaak. A ricibi e aporte ey entre otro como gradicimento pa e entradanan grandi cu e empresa (t)a ricibi como cobransa na gasto di administracion como resultado di e pensioen obligatorio empresarial cu a introduci poco prome. Y/of pa e interes cu lo cobra pa e prestamonan grandi cu e lo por ofrece gobierno cu e placa di premie cu (t)a ricibi. Y/of pa e posibel cooperacion di Gobierno pa yuda suavisa e stipulacionnan severo di inversion na Aruba. Esey lo permiti empresa financiero grandi pa inverti mas placa den exterior en bes di e obligacion di cumpra bono riesgoso di un Gobierno cu ta practicamente bancarota.
Tanto pa e empresa como pa Gobierno esaki ta un situacion cu tur dos ta sali gana: e gastonan di administracion y e pago di interes di parti di Gobierno ta nifica un compensacion garantisa pa e empresa pa e aporte cu el a duna na caha di campaña. Pa gobierno esaki ta nifica un ampliacion bonbini y casi sin limite di e posibilidadnan pa fia placa riba mercado local. Asina mes esaki no ta e unico contribucion cu ta crea interogatorio. Na mesun manera contribucion na fundacion di (partido) politico di parti di un inversionista rico di exterior, cu husticia Mericano a sentencia pa motibo di corupcion, lo por causa hopi duda tocante integridad di esnan cu a ricibi su contribucionnan.
E pregunta grandi ta si aki ta trata di echo of ficcion. Pa un gobierno cu ta haci todo lo posibel pa stroba ponemento di e ley di ‘Financiamento di partido politico’ riba e agenda politico, claramente ta trata di ficcion maligno. E ausencia di ley cu ta obliga transparencia den contribucion pa campaña politico y e esfuersonan transparente di e Gobiernonan consecutivo di diferente color politico pa no pone e tema aki riba e agenda politico, ta haci cla cu ningun partido politico ta interesa pa duna transparencia den su financiamento cu frecuentemente sa tuma luga pa medio di fundacion. Asina ta mantene e inversionistanan pafo di bista mientras cu no por culpa politico di conflicto di interes of pio.
E repugna grandi di politico Arubiano pa cu financiamento di partido politico ta sali na cla for di e echo cu apesar cu prome ministro di e tempo ey, Sr. Nel Oduber (MEP) y lider di oposicion sr. Henny Eman (AVP) na 1993 a priminti unanime- y solemnemente pa regla e ley di Financiamento di partido politico obligatoriamente, hasta pa medio di Statuut, nan promesa por escrito na Hulanda a resulta di ta un promesa morto. Apenas 7 aña despues e Gobierno (di AVP) di e tempo ey a ripiti e hazaña aki door di pone e palabracionnan cu sindicato, manera acorda den Protocol 2000, completamente un banda. Na mesun manera partido MEP cu despues di esey a haya e oportunidad pa efectua e acuerdo aki, no a mustra ningun interes. Como consecuencia e posibilidad di comunidad pa averigua si partido politico ta corupto, a keda un ficcion.
E pregunta grandi ta si Gobierno di Aruba por persevera den e posicion aki. En realidad Aruba ta e unico pais den Reino cu no conoce Ley di Financiamento di partido politico. E cooperacion cu e Gobiernonan semper a ricibi di nan Parlamento tampoco por sigui persisti, maske cuanto nos Parlamento ta enfoca na funciona na agrado di nan Gobierno. Ta parce cu tur e ‘dealnan’ cu (t)a resulta di financiamento (ilegitimo) di partido politico a contribui na gran escala na e practica di proyecto dudoso cu a causa comunidad Arubiano hopi daño den e ultimo 3 decadanan. Consecuentemente e responsabilidad cu parlamentario lo mester carga pa cu comunidad tambe ta resulta di ta ficticio.
Pero Hulanda tampoco por sigui laba su mannan den inocencia. Mescos cu Hulanda, segun e veredicto den e ‘caso Murray’ ta carga un responsabilidad adicional na realisacion di derecho humano den Reino, na mesun manera e ta carga tambe un responsabilidad na realisacion di bon gobernacion. Si ta asina cla cu ta perhudica interes general na un manera asina bergonsoso pa motibo di mal gobernacion sistematico, Hulanda no por keda sinta mira na banda a base di e pretexto di pais autonomo den su Reino. Hulanda por bari e menasa di si partnernan Caribense, cu lo keha Hulanda riba e plataforma internacional pa motibo di ‘recolonisacion’, facilmente for di mesa a base di documentacion ampliamente disponibel tocante mal maneho gubernamental sistematico. Sinembargo, introduccion concreto di e Ley pa Financiamento di partido politico ta apenas e prome paso aunke sea indispensabel, pa destrosa e ficcion di bon gobernacion na Aruba.
Skirbi pa Armand Hessels
Presidente di Fundacion Gobernacion di Calidad Aruba