Diasabra 18 y diadomingo 19 di maart 2023 lo tuma luga na Club Aruba Juniors na Socotoro e finalnan di e Torneo Himno y Bandera 2023. E aña aki lo tin participación di Bonaire Stars for di nos isla ruman Bonaire y Los Amigos di Corsou. Glovers, Astros, Surprise y Aruba Juniors ta e teamnan di Aruba cu lo participa den e finalnen. Aruba lo ta bon representa cu hungadonan di trayectoria largo manera Rock Angela, Feliz Thiel, Joy Orman y Alex Falconi.
E teamnan ta parti den dos poole cualnan ta A: Glover, Aruba Juniors y Stars di Bonaire y B: Astros, Surprise y Los Amigos di Corsou. Pa 9:30 AM diasabra mainta umpire lo canta Playball pa Glovers enfrenta Aruba Juniors. E di dos wega cu ta programa pa 11:15 lo ta entre Astros y Surprise. Despues ta sigui e weganan Glovers contra Bonaire Stars y Astros lo enfrenta Los Amigos den e ultimo wega di e finalnan di diasabra. Pa 4:30 PM lo tin un wega amistoso cu lo bay entra Boomerang y Tigers. E weganan ta continua diadomingo mainta cu Aruba Juniors enfrentando Bonaire Stars sigui pa Surprise contra Los Amigos. Pa 1or PM lo tin e wega pa wak ken ta sali nr 3 di e torneo. E gran final lo wordo hunga entre e ganado di e dos poolenan. E wega final ta programa pa cuminsa 2:45 PM.
Manera ta tradicion, diasabra 18 di maart, lo tin un ceremonia unda cu lo duna homenahe na dos persona cu a contribiu na e deporte di softball. Ta trata aki di Ferdinand Flanders di Aruba Juniors y Gordon Toussaint kende ta e entertainer deportivo mas popular cu Aruba a yega di conoce.
Di 4or en adelante Gordon Disco lo pone ambiente cu su musica bon varia. Diadomingo durante e finalnan Je’O 297 di Jersey Isenia lo los algun piesa pa tur bailado presente. Jersey no ta un desconoci den e mundo di música. E tabata cantante estelar di Doble R na Corsou y Pegasaya na Hulanda. Tambe e tabata finalista varios biaha di e festival di tumba di Corsou. Bar y cushina manera ta custumber lo ta bon gestok. Si bo ta gusta wak bon wega di softball den un ambiente familiar ta na Club Aruba Juniors bo mester ta. Nos ta warda bo diasabra y diadomingo pa celebra Aruba su Dia di Himno y Bandera.
