Prome cu e Gran Final, e competencia di talento a conoce dos pre-final den october y November. E resultado di esaki tabata 14 finalista den e ramonan di canto, rap, musica (banda), arte visual, arte di palabra, teatro y baile. E Gran Final dia 10 di December a demostra hobennan creativo, cu perseverancia y cu ta proyecta meta mas aleu pa cu nan desaroyo creativo. Un bunita laso a forma entre e hobennan mes, bou di e liderazgo di John Freddy Montoya y Julie Merencia di DCA, mientras Cas di Cultura a crea espacio pa ensayonan, promocion y aporte tecnico entre otro.
Mientras cu e show a conoce varios contratiempo cu a pone e show bay largo, e ekipo tecnico y di produccion a haci lo maximo pa e participantenan por a sinti nan comodo pa nan por ehecuta nan presentacion. E maestronan di ceremonia Juelle Thodé, Junior Tromp y guest di Corsow srta. Lilimar Valencia di Teatro Luna Blou a percura pa un bon entretenimiento di publico y bon animo.E presentacionnan cu e hobennan a crea tabata tin e enfoke riba Papiamento como refleho di 2018 como aña di Papiamento. A scucha rock na Papiamento, arte di palabra, composicionnan nobo y baile riba hitnan na Papiamento. Tabata interesante di presencia con hobennan cu kisas tabata presenta den Ingles of Spaño so anteriormente a sobresali door di reta nan mes pa crea un obra na Papiamento. E resultadonan a sorpresa publico agradabelmente. E presentacionnan lo ta visto pronto riba pagina di Facebook di tanto Manic Monday como di Gang di Arte Aruba.
E resultadonan di e Gran Final tabata lo sigiente:
Premio Popular: Kelsey Westerburger
Premio miho mensahe: Sombra (Lucius Kanaar, Guicel Krozendijk, Jeston Arends, Manuel Alfonzo Lopez Hernandez
Premio Papiamento segundo luga: Shjakayne Manuela
Premio Papiapemnto prome luga: Kevin ‘Nahliel’ Marquez
Di 3 finalista: Seshaji (Tyrone Chirino, Ferghall Vlaun, Rogianne Wijman)
Di 2 finalista: Seshafam (Joel Recappe, Ginsing Obispo, Lenny Espinal)
Prome finalista: BMT (Brandon & Zef Kerr)
Ganado absoluto: Cy-Anne Simmons Cas di Cultura y Departamento di Cultura Aruba ta gradici tur participante y tur colaborador cu a haci e serie di competencianan aki posibel den 2018, mientras DCA lo anuncia su inscripcion pa Gang di Arte 2019 pronto. CdC y DCA ta desea Aruba henter felis dianan di fiesta y cu den 2019 Arte y Cultura ta mas presente den tur hogar pa embeyece bida y inspira.