Awendia henter mundo conoce “El Sistema” di Venezuela, e programa di enseñansa di mucha cu ta uza les di musica como plataforma. Por cierto, e proyecto di crea un sinfonica hubenil y infantil na Aruba lo sigui e ehempel di El Sistema cu e ilustre Dr. José Antonio Abreu a desaroya y haci asina famoso, y nan lo uza e metodologia desaroya pa Dr. Emil Friedman.
Ta poco hende pafo di mundo musical di Venezuela sa cu tabata e ilustre Dr. Emile Friedman cu a inventa e metodo cu Dr. Abreu a plama mundialmente.
Ken ta Emil Friedman? Emil Friedman tabata un intelectual sumamente bon studia. El a nace
na aña 1908 naPraga, Checoslovakia caminda el a studia y logra e titulo di Profesor di fiyo na edad di apenas 17 aña. Despues di haci un gira largo tocando na Europa, Australia, Hong Kong, Turkia, Israel y Egypte, el a bolbe universidad y el a logra su doctorado den leynan publico na Universidad Carolina di Praga. Dos aña despues, Friedman ta logra Doctorado di Filologia Clasico, Latin y Griego, na Cambridge, Inglatera y como sifuera esaki no tabata suficiente, un aña despues Friedman a obtene su di tres doctorado na Universidad Carolina di Praga.
Anticipando e teror cu Hitler lo trece na Europa, Dr. Friedman a dicidi di emigra pa America Latino y despues di pasa algun tempo na Santo Domingo a establece na Maracaibo, Venezuela caminda el a sigui e carera cu semper e tabata desea, den mundo musical. Tin indicacion,no comproba, cu Sr. Friedman cu tabatin Fruteria La Universal den caya principal na Oranjestad, tabata un famia di Dr. Friedman.
Dr. Friedman tabata Director di Academia di Musica di Estado Zulia te 1948. Aya el a dirigi e famoso Cuarteto Maracaibo y el a crea Sociedad Zuliana de Conciertos, e prome orkesta di cuerda di e estado Zulia.
Cu su educacion enorme, Dr. Friedman a premira e necesidad di entrena pedagogonan musical pa saca probecho di loke el a considera e talento musical natural grandi di Venezolanonan y pa duna un oportunidad na e muchanan di scol pa experimenta cu instrumentnan musical clasico manera un fiyo. Cu e ideal aki e inmigrante di Praga a funda e Kindergarten Musical Emil Friedman na su pais adoptivo.
Despues cu el a casa na aña 1953 cu e profesora Elvia Argúello, maestra y pianista di Zulia,Dr. Friedman ta cuminsa un programa educativo. Cu e lema No hay cultura sin cultura musical e kindergarten musical ta converti den Colegio Emil Friedman y esaki a bira e inspiracion pa e creacion di e SistemaNacional di OrkestaHubenil y Infantil di Venezuela.
Segun Friedman, “Educacion tin cu desaroya e sentimento cu e artenan, e mente cu ciencia, y e curpa cu e deportenan.”Friedman su filosofia tabata cu musica ta habri un caminda special y rapido pa muchanan desaroya nan sensibilidad y motivacion pa otro manifestacionnan artistico. P’esey e Colegio Friedman a crea un modelo educativo basa riba desaroyo harmonioso di intelect y sentimento, un sistema cu ta cultiva materia academico na un banda y na otro banda, musica pa aumenta e sensibilidad artistico y p’esey,e sentimentonan.
E meta di e proyecto Orkesta Sinfonica Hubenil y Infantil di Aruba, mescos cu El Sistema di Dr. Abreu, lo uza e filosofia di Dr. Friedman. Desaroya sentimentonan cu musica. Ta comproba cu un hoben cu sentimentonan bon desaroya lo bira un ciudadano respetuoso, balente, cooperativo; un ciudadano valioso y ehemplar.