Recientemente Dr. Horacio E. Hospitaal a pone nan ‘Empleado di Luna’ di Augustus “in the spotlight” cu un bon sorpresa, hopi alegria y un aplauso masha grandi. John Fun, kende ta e clustermanager di Facilitair Bedrijf, como hefe di e empleado honra, esta Filomena Tromp , a laga sa cu Filomena ta literalmente “e curason di cushina di hospital”.
Filomena Tromp a cuminsa traha na Hospital San Pedro di Verona na januari di aña 1972. E tabata traha den e “brood keuken”, esta e cushina unda cu ta prepara sandwich pa e pashentnan. No a pasa mucho tempo cu Filomena a bira un tipo di “invalster” pa e dietista di hospital y tabata yuda den e parti administrativo di e trabao di e dietista.
Ora hospital a muda pa e edificio na Eagle Beach, Filomena Tromp a wordo ofreci retonan nobo. Esaki a inclui traha cu e prome sistema automatisa di cushina. Tabatin cambionan grandi y e no tabata sa di e trabao, pero el a tuma su responsabilidad nobo y haci su tareanan cu masha entusiasmo. El a forma parti di e introduccion di e di dos sistema automatisa, y actualmente ta trahando riba introduccion di e di tres sistema automatisa pa cushina den su funcion actual di “Logistiek Medewerker Keuken”.
John Fun ta splica cu Filomena ta haci un trabao hopi importante. E ta colecta tur datonan di e pashentnan pa loke ta trata nan pedido di cuminda; e ta tira e listanan cu e cokinan ta haya pa nan prepara, y ta monitor e menunan cu tin disponibel. Ademas, Filomena ta esun cu ta percura pa tur e pedidonan wordo traha y pa nan sali tur siman pa e menunan cu ta wordo prepara e siguiente siman.
Cu e conocemento cu Filomena Tromp a adkiri, ora cu e ta monitor e menunan, e ta dicidi tambe cua cuminda ta apto y cua no ta por sirbi e pashentnan, y e ta kita e cumindanan cu ta por ehempel mucho vet for di e menu.
E trabao di Filomena no ta facil, e ta responsabel tur dia pa 250 pashent, cada un cu un dieet cu ta pas cu su condicion. John Fun a subraya cu sin Filomena e cushina no por draai, e team ta hopi contento y ta para 100% tras di e decision pa nombr’e empleado di luna. E ta un orguyo masha grandi cu a scoge Filomena pa e honor aki.
Filomena mes a conclui bisando, un poco emociona, cu p’e e anuncio tabata un sorpresa grandi y e ta hopi, hopi contento cu gerencia di hospital y su coleganan a nomin’e.