Despues di algun luna di preparacion basta intensivo, e alumnonan cu a forma e ekipo di G4N edicion di sport bou guia di e docentenan Patrick Lejuez y Eric Farro, a clausura nan actividad. Esaki tabata sin duda, un actividad exitoso, specialmente si mira e entusiasmo y dedicacion cu e alumnonan a presta pa ehecuta e planificacion como e actividadnan mes, specialmente e gran final.
For di e oranan trempan di diadomingo mainta, a cuminsa cu un caminata di 5km den e bario di San Nicolas, unda cu varios docente, mayor, alumno y e fiel canadonan, a join pa asina engrandece e actividad como tambe aporta na nan propio bienestar general. Despues di esey, tabatin diferente actividad cu a tuma luga, tanto na scol mes, YMCA, Theresita Center y Joe Laveist. Cada luga tabatin cierto orario y actividad planea, di cual mayoria tabata masha gusta y bon bishita. E reaccion di e participantenan sin duda tabata uno hopi positivo mes y nan a gusta con envolvi e alumnonan mes tabata. E actividad aki di G4N edicion di sport, a surpasa tur expectativa y a logra pone un comunidad, mediante e scol, uni pa haya mas informacion y movecion pa nan salud y bienestar general.
Mr. Eric Farro y mr. Patrick Lejuez, e dos motornan tras di henter e proyecto aki, conhuntamente cu e team dinamico di studiante, kier manda un palabra di danki enorme na henter directiva, personal y e alumnonan di Filomena College Mavo, como tambe e bario di San Nicolas en general. Un palabra di gradicimento special ta bay na tur cu a aporta e dia aki, den nan seccion, esta: Rene Wild, Francisco Goedgedrag, Jean Kock; Movecion y salud, Andrea; Zumba, Gladys; Yoga, Amber van den Berg; Yoga, Jump & Splash, Mike Superdisco, YMCA, Joe Laveist, Muscle & Lungs, Tai Chi, Theresita Center, SABA, Community Pool, Andina Ice, D.O.W., K.P.A.
No por laga afo tur e medionan di prensa, cu semper a sa di brinda nos un tremendo espacio, pa publica nos comunicadonan y asina yuda nos engrandece nos actividad.Por bishita e pagina di Facebook; Filomena#G4N2016 y por admira con e alumnonan y tur participante a experiencia e actividadnan di G4N 2016.