Diasabra ultimo, e alumnonan dinamico di Filomena College Mavo su team di G4TN a realisa nan dia di movecion, cu 2 grupo di nos grandinan na San Nicolas, bou guia di e docentenan Patrick Lejuez y Eric Farro.
Despues di algun tempo ta preparando, e 2 actividadnan a tuma luga, cuminsando pa 8or di mainta na Community Pool, unda cu algun señora a bin hunto pa experiencia y participa na e aquarobics. Glen Eights tabata esun encarga cu e actividad aki y a sa di prepara un repertorio di movecion netamente pa e grupo aki, combina cu musica atractivo. E damanan sin duda a disfruta plenamente di e 1 ora di movecion den awa. Despues di esaki, e damanan por a disfruta di un delicioso plato di fruta, prepara pa e propio alumnonan y tambe tabatin e opcion di un batido di fruta fresco.
E actividad na SABA, cas di hende grandi na Palisiaweg, tabata e siguiente experiencia pa e hobennan. Bou auspicio profesional di sr. Rudy Leysner, e grandinan di SABA, cu ayudo di e alumnonan, nan a eherce algun movecion, segun nan capacidad y habilidad. Pa e alumnonan esaki sin duda tabata un experiencia unico, unda cu for di nan curason y disposicion, nan a haci e actividadnan aki cu e grandinan. Por a sinti y mira un grupo dinamico y entusiasma, haciendo algun movecion hunto cu e hobennan. Mas cu claro, cu na final di e actividad aki, e grandinan tambe por a disfruta di un delicioso plato di fruta of batido di fruta fresco, prepara cu hopi cariño pa e alumonan mes.
E entusiasmo ta halto y e team dinamico di nos alumnonan di G4TN di Filomena College Mavo, ta den ful preparacion pa nan actividad final, cu ta tuma luga diadomingo awo, dia 13 di November proximo. E actividad lo inicia 7or di mainta cu un caminata di 5km y despues lo tin varios actividad deportivo pa tur edad y tur esaki ta completamente pornada. Lo cera e caminda completo for di Filomena College te YMCA pa e actividad aki, unda lo tin diferente charla educativo tocante salud y movecion. Por bishita e pagina di Facebook; Filomena#G4N2016 y por admira con e alumnonan ta experenciando tur e actividadnan aki.