Rotaract desde aña pasa a cuminsa cu un programa di motivacion y educacion, cu e alumnonan di klas 4 di Filomena College Mavo, pa asina por duna nan extra guia y conseho riba nan forma di studia y planifica nan studiamento.
Mirando cu e famoso S.E.1 ta cuminsa awe, esta dialuna 24 October na tur e scolnan Mavo rond di Aruba, Rotaract a prepara un anochi educativo y hopi informativo pa e alumnonan di klas 4, conhuntamente cu nan mayornan. E anochi tabata completamente dirigi riba e formanan di studia mas eficiente, kico tur ta loke nan mester tene cuente cu ne ora nan ta studia, como tambe unda nan ta perde tempo innecesario y ta kita nan concentracion, manera; Facebook, Instagram, Snapchat, etc.
No tin duda cu awendia, studiamento ta un clave principal den e exito di bo estudio como tambe futuro. P’esey mes ta sumamente importante y relevante pa inculca un bon guia y conseho na nos alumnonan di examen, pa nan por haci uzo di e hermentnan necesario pa logra nan exito desea. E material desaroya pa e alumnonan, sigur a cay na hopi bon agrado y di bon uzo, ya cu nan a haya un splicacion elabora con nan por uza e planificacion aki den nan studio como nan bida diario. Di e forma aki Rotaract ta sigui fortalece su laso cu e alumnonan y famia di Filomena College Mavo, contribuyendo grandemente na formacion y exito di nos hobennan.
Henter e famia grandi di Filomena College Mavo ta gradici Rotaract pa nan aporte y balioso atencion cu nan ta duna na nos hobennan. Tanto e team completo di Filomena College Mavo como e team dinamico di Rotaract ta desea tur e alumnonan di klas 4 Mavo na Aruba, tur clase di exito cu nan S.E.1 y sigui ta un studiante ehemplar y motiva pa nos dushi pais Aruba.