E compania JetBlue tin un proyecto di responsabilidad social, unda cu nan ta haci diferente proyecto na bienestar di nos comunidad. Dia 15 di September JetBlue a cumpli 10 aña bulando pa Aruba. En conexion cu esaki, nan a scoge 1 scol pa haci entrega di 10 laptop refurbished, ya cu e mundo digital ta pone cu enseñansa tambe mester cuminsa enfoca y inverti mas den esaki.
Filomena College mavo a logra ta e scol afortuna, di por ricibi e 10 laptopnan aki, cu sigur lo haya un excelente uzo den e lesnan. E parti di tecnologia ta di sumo importancia, specialmente cerca nos hobennan, ya cu varios les por wordo realisa na un manera mas agradabel y interactivo, haciendo uzo di laptop. Filomena College mavo tin vision pa pocopoco cuminsa bay den e direccion di ‘green’ y tambe tecnologia, incorporando diferente uzo di tecnologia di e materianan. No tin duda cu e lesnan aki, e alumnonan ta disfruta masha y ta siña di otro hopi mas.
Filomena College mavo ta gradici JetBlue cu e tremendo gesto aki, ya cu e regalo aki ta permiti e docentenan extende nan programa, fortaleciendo e habilidadnan tecnico y digital di e hobennan, contribuyendo asina na un enseñansa di mas calidad. Di e forma aki JetBlue conhuntamente cu Filomena College mavo ta construi e habitonan clave riba e aspecto di responsabilidad social y educacional, inculcando cierto habilidad di liderazgo cerca e alumnonan. Como resultado di e proyecto aki, un cantidad di alumno ta haya oportunidad di ta exponi den un ambiente di educacion positivo.