Despues di varios luna di trabou, dedicacion, motivacion y supervision, Filomena College mavo por mira fruto di un excelente resultado di graduado pa 2016 – 2017. Un total di 63 alumno tabata forma parti di e ekipo di klas 4, unda cu 54 alumno a logra pasa cu exito rotundo den e prome tanda di graduado, cual ta forma 86%.
Sin duda, esaki ta un excelente resultado y henter e team dinamico y energetico a traha duro, conhuntamente cu e alumnonan pa logra 86% di graduado. Pa di dos aña Rotaract ta contribui tambe cu parti di preparacion y motivacion di nos alumnonan di klas 4, unda nan ta bin cu charla di motivacion y workshop pa duna guia, conseho y informacion.
E miho graduado pa 7 materia ta e alumno: Magdala Jean Louis, cu a logra 53 punto y e miho graduado pa 6 materia ta e alumno: Jean Micheal Kelly, cu a logra 44 punto. Henter team di Filomena College mavo ta sumamente orguyoso y feliz cu e tremendo resultado aki, ya cu asina nos hobennan ta demostra cu nan tin potencial y capacidad pa logra loke nan propone den bida, pa asina sinti e gran satisfaccion di trabou duro y sacrificio na final.
Jufr. Sue-Ann Ras como coordinador di klas 4 y mentrix, conhuntamente cu mentrix jufr. Nicole Leslie y mentor mr. James Aroeman kier gradici cada un di nos coleganan di Filomena College mavo, cu a traha duro y motiva durante henter e aña aki, como tambe Rotaract, directiva y e mayornan di nos alumnonan, ya cu sin nan apoyo incondicional, nos no por disfruta di e exito aki. Di curason masha masha danki mes.