Awendia e mundo digital ta pone cu enseñansa tambe mester cuminsa enfoca y inverti mas den esaki, percurando asina pa yega na un miho un servicio educativo na su alumno y nan mayornan. Cu esaki den mente y vision, e dos mavonan; Filomena College y Maria College a bin hunto diahuebs mainta pa haya un tayer completamente dirigi riba diferente programa y caracteristica nobo di e LVS; Aim 4 Me, cual compania ta haci uzo di e website di myschoolresults.
Hopi ta e scolnan cu ya ta haci uzo di e sistema di LVS (Leerling Volg Systeem), cu ta un forma digital pa keda monitorea y vigila e alumnonan su proceso na scol. E mayornan tambe ta haya acceso na esaki, pero for di investigacion a resulta, cu ta masha poco ta haci uzo di dje y esey ta sea door di falta di acceso na internet of door cu nan no tin mucho conocemento con pa uza e sistema.
E tayer Aim 4 Me, presenta ta pa yuda e maestronan ta mas productivo y efectivo riba e sistema di LVS; myschoolresults, unda cu pocopoco ta bira mas activo den e mundo digital, pa asina e mayornan tambe por tin mas informacion y vigilancia di e proceso di nan yiunan na scol. Tin varios aspecto cu ta di suma importancia y relevante ora ta traha cu LVS, manera; check cifra, tarea di cas, ausencia, etc. No tin duda cu ambos scol secundario ta trahando duro pa brinda un miho enseñansa y incorpora mas di e mundo digital, p’asina brinda mas di e proceso escolar na e mayornan.