FIFA ta inhabilita ex presidente di Confederacion Brasilero di Futbol pa bida largo

ZURICH, Suisa- E organo di decision di e Comision di Etica independiente di e Conseho di Federacion Internacional di Futbol (FIFA) a inhabilita Jose Maria Marin, ex presidente di e Confederacion Brasilero di Futbol (CBF) pa bida largo. Esaki pa motibo di corupcion.
Pa medio di un comunicado e organo di decision a splica cu Marin, di 86 aña y ex miembro di varios comite di FIFA, a wordo declara “culpabel di a viola e articulo 27 di e Codigo di Etica di FIFA (cohecho/soborno).
Ademas, e ta agrega cu e investigacion cu a wordo realisa na Marin ta relaciona cu “varios caso di soborno durante e periodo cu ta core for di 2012 te cu 2015, relaciona cu e concesión di derechonan di television y mercadeo di varios torneo di Conmebol, Concacaf y CBF”.
Por lo tanto, e organo, según e comunicado, a dicidi di prohibi e participacion di Marin pa vida largo pa a participa den actividadnan relaciona cu futbol (administrativo, deportivo of di otro indole), tanto na nivel nacional como na nivel internacional.
Di mes manera, el a haya un boet di 1 miyon franco Suiso ( mas di 995 mil dollar).
Na 2015, e ex futbolista, abogado y politico Brasilero a wordo aresta den un hotel di luho di Suisa, hunto cu otro responsabelnan di futbol, den cuadro di e asina yama ‘ ‘FIFA Gate’ y, despues, el a wordo extradita pa Merca. Na 2018 el a wordo condena na cuater aña di prizon pa su rol den un caso di corupcion di e organismo.

Comments

comments