Presidente di e Federacion Internacional di Futbol (FIFA), Gianni Infantino, a revela cu e organismo ta studiando e posibilidad di aumenta e cantidad di ekiponan pa mundial 2022 y pa Qatar comparti e sede cu otro paisnan di Medio Oriente.
Na comienso di 2018, FIFA a dicidi di amplia e mundial di 2026 for di 32 pa 48 seleccion. E mundial aki lo wordo organisa pa Merca, Canada y Mexico hunto. Esaki ta laga e porta habri pa aumenta e cantidad di paisnan cu lo hunga na Qatar aki cuater aña.
“Nos a dicidi di aumenta e cantidad di ekiponan cu lo participa den e Copa Mundial for di 32 pa 48 y esaki lo tuma luga na 2026. Kico lo pasa na 2022? Nos ta studiando esaki ainda. Si e ta posibel, pakico no?”, segun Infantino a bisa den su discurso den e Congreso Anual di e Confederacion Asiatico di Futbol.
Infantino a agrega, cu e ampliacion di e torneo, Asia lo wak su cuponan mundialsita di 4,5 pa 8,5. “Nos mester wak si e ta posibel, si e ta factibel. Nos ta discutiendo esaki cu nos amigonan na Qatar, cu nos amigonan den e region y ta spera cu esaki por sosode. Y si no, toch nos a purba. Semper mester busca manera pa haci e cosnan di un miho0 manera”.
Qatar, un estado chikito den Golfo Persico den cual ta biba mas di 2.5 miyon persona, na 2010 a gana e derecho di ta e sede mundial 2022. For di e tempo ey e ta bin ta trahando pa organisa un torneo pa 32 ekipo. Infantino a reconoce cu pa aumenta e cantidad di seleccion den e proximo mundial esaki lo rekeri e cooperacion di otro paisnan den e region.
Sin embargo, Qatar ta den un disputa cu varios di su bisiñanan. Arabia Saudita, Bahrein, Emiratos Árabes Unidos y Egipto a reduci e intensidad di nan relacionnan diplomático y comercial cu Doha pa supuesto financiamento di terorismo.