Diadomingo Club Kibrahacha 60+ a tene su bazaar “Fiesta Kibrahacha” pa recauda fondo pa asina sigui ofrece nos grandinan e atencion cu nan merece.
Durante henter dia boluntariamente varios grupo musical a deleita tur esnan presente cu musica tradicional crioyo.
Tinchi Faro cu caha di orgel “El Diamante” di su tata Patan y Oslin Trimon cu su caha di orgel “Trupial”a habri e fiesta. Tur dos a wordo acompaña pa Keke Giel cu su wiri.
Pa motibo di salud Nelson Sprok no por a presenta cu caha di orgel “Nos Ambiente”. Segun Erick Uchtmann di Club Kibrahacha, “Mi no por corda un evento di Club Kibrahacha 60+ sin Nelson cu su caha di orgel, Nos tur ta desea Nelson un pronto recuperacion.
Despues di e musica di caha di orgel grupo “Los 3” a presenta cu nan repertorio di “Melodias del pasado”.
“Los 3” ta purba mantene nos cultura musical cu nan repertorio di danza, mazurka, wals y tumba.
Siguiente grupo cu a presenta ta “Tico y sus Estrellas”. Un grupo cu tur aña ta presente. Entre otro nan a toca algun merengue tradicional Dominicana,
Ambiente musical na Kibrahacha a sigui cu un tremendo presentacion di e grupo Aguinaldo “Flor di Pasco”, Un grupo di persona di tur edad cu e meta di mantene e Aguinaldo tradicional. Cu nan presentacion tur esnan presente ya a cuminsa sinti e ambiente di Pasco.
Papito y su “Biba Lekker Band” a termina e dia existoso di “Fiesta Kibrahacha”.
Pa añanan famia di Papito ta bin di Corsou pa disfruta di e tremendo ambiente di “Fiesta Kibrahacha”. Den e grupo di Papito nos por a mira Robert J’eandor, cantando y tocando su baho.
Un muestra di gratitude ta bay na tur e musiconan cu a percura pa un dia inolvidabel.
Ya cu mi a caba duna e relato di “Fiesta Kibrahacha” ami personal kier tuma e oportinidad di trece e siguiente pa dilanti.
No solamente e gruponan menciona pa “Fiesta Kibrahacha” , pero mas grupo (tipico) ta purba mantene nos tradicion musical.
Poco biaha nan ta haya e oportunidad pa trece nan repertorio crioyo. Pa ehemplo durante inauguracion di un edificio/proyecto nobo, presentacion di un compania/producto nobo, Bonbini na un delegacion, etcetera.
Cu crucero ami a bishita varios isla den Caribe. Bahando di e crucero bo ta wordo ricibi cu musica traditional di e isla. Tin puerto unda grupo musical ta subi bordo pa deleita pasahero cu nan musica.
Na hopi luga turistico bo ta topa gruponan musical, tocando nan musica tradicional.
Tur nan presentacion ta wordo coordina entre Min. di Cultura, Min di Turismo y Comercio.”