Diadomingo 25 di September Stichting Monumentenfonds Aruba, Santa Rosa, Departamento di Cultura Aruba y Fundacion Museo Arubano a organisa pa di tres aña consecutivo e Fiesta di Cunucu.
E actividad ta organisa den cuadro di luna di monumento, riba e ultimo diadomingo pa asina clausura e luna di Monumento.
Despues cu a tene ya e evento den bario di Tanki Leendert y Brazil, awor a toca turno na Noord.
E Fiesta di Cunucu tabata un exito caminda cu tabata tin un programa cultural varia cu bailenan folklorico, musica di harpa, tambu, steelband y hopi mas.
Banda di e musica y bon ambiente e publico por a disfruta di un variacion di cuminda local y productonan local cu tabata tin na benta den e Mercado di Santa Rosa.
E publico a haya chens di haya un idea con e hendenan tabata biba antes den e cas di cunucu cu tabata muebla cu mueble y artefactonan di Community Museum San Nicolas cu ta parti di Fundacion Museo Arubano. Tambe e Wantombanan cu ta forma parti di e Fiesta di Cunucu pa di 3 aña a pone ambiente total pa e publico.
Stichting Monumentenfonds Aruba, DCA, Santa Rosa y FMA kier a yama un danki na un y tur cu a aporta na e tremendo Fiesta di Cunucu 2016.