Diasabra anochi dia 13 di October 2018 lo tuma luga un fiesta bailabel sumamente interesante mirando cu 4 banda local lo sa di pone bon ambiente pa asina tur hende por gosa. Ta trata aki di e bandanan Robert Jeandor y Su Solo Banda Show, D’- Licious, ‘N Fuzion y Tsunami. Sra. Vanessa Croes- Croes, cu e detayenan.
Meta di e fondonan aki ta pa finalisa e ultimo fase di reparacion di misa cu ta pasando den un proceso largo di restauracion. E idea inicial a cuminsa na e dak cu tabata esun mas importante. Pero den dialoga y intercambia pensamento a bin cu e idea pa bin cu e airco, ya cu esaki no ta un luho mas, pero mas bien un necesidad. Asina tambe e binimento misa ta bira mucho mas placentero tambe, segun Sra. Croes- Croes.
Aruba ta hopi entusiasma pa e evento aki debi cu no ta tur dia bo ta haya e oportunidad di baila tur e bandanan aki riba un anochi.Renaissance Convention Center lo ta e sitio di e evento aki cual ta uno hopi comodo pa por acomoda tur e bandanan y e publico. Por cumpra carchi door di jama 7330505 of 5628624 of pasa na Sandra’s Garden. Tambe por subi Facebook page di Parokia di Birgen di Fatima of Vanessa Croes- Croes, pa cualkier informacion.
Pueblo di Aruba ta keda cordialmente invita pa bini hunto na e tremendo fundraising aki y asina hunto por logra e meta.