Den e weekend venidero e dianan 9 y 10 di December lo tuma lugar e Festival Equino, cual lo bira e ultimo competencia pa loke ta e calendario di e federacion di OCA. Lo bay tin dos categoria esta cabay menor di sesenta luna y mayor di sesenta luna esaki pa cada modalidad, mientras e prome tres puestonan lo pasa pa e gran final.
E diadomingo den oranan di atardi lo inicia cu e categorianan di mucha y hobennan esta principiante como tambe e categorianan di Jinetes & Amazonas. Special pa e evento aki lotrece un juez renombra di Puerto Rico.
Den e aña 2017, e Organisacion Caballista Arubano, OCA a organisa un total di 8 competencia local di cual e Interpaso 2017 den luna di september como esun di mas grandi. Tambe a bishita 3 competencia den exterior cual tabata na Pereira, Colombia, Spectrum International na Miami, Florida y e Mundial na Bogota, Colombia. Mas cu claro e prestacion di nos Amazona y Jinete ta sobresali unda nan ta logra conkista premionan grandi den exterior, como esun mas memorabel e 30 premionan logra den e Spectrum International na Miami, Florida. E aña ako tambe OCA tabata tin Melanie Wever y Willem Werleman como nominado den e prestigioso Premio Excelencia den Deporte unda Aruba ta reconoce su miho atletanan di aña. Den 2018 un bes mas e calendario di OCA lo ta basta ocupa cu competencianan na nivel nacional y internacional.
Un danki sigur na Lotto, e Loteria di Aruba pa medio di St. Sportsubsidie Aruba cu a subsidia e e ultimo competencia di e calendario di OCA, esta e Festival Equino 2017.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.