Manera tradicion di tur aña, Comision Promove Cultura ta den pleno preparacion pa loke ta e Festival Infantil-Hubenil di Dande. E aña aki den cooperacion cu Departamento di Cultura di Aruba e festival lo tuma lugar dia 29 di December na Plaza Libertador Gilberto François “Betico” Croes. Comision Promove Cultura ta sumamente contento cu e desaroyo aki, mirando cu ya pa varios aña tabata tin e deseo di mira e festival aki riba e Plaza cu ta traha pa Aruba celebra su cultura.
Festival
E festival ta programa pa cuminsa 6or di atardi riba Plaza Betico y lo ta combina cu diferente tentnan di cuminda, artesania y sigur un bar bon surti.
Esaki ta e di 16 festival di Dande Infantil-Hubenil cu ta wordo organisa pa Comision Promove Cultura. E ultimo 15 añanan el a wordo organisa na Centro di Bario Tanki Leendert y semper e acogida tabata halto y e ambiente sigur ameno y hopi familiar. E intencion di e festival aki ta pa inculca e tradicion di Dande den nos hobennan pa asina nos por mantene e bunita cultura aki, cu sigur ta algo unico na Mundo.
Den añanan 70 tabata nos propio Libertador Betico Croes d.f.m. cu hunto cu sr. Harry Croes a cuminsa cu intentonan pa rebiba e tradicion di Dande y awe sigur ta un honor pa Comision Promove Cultura por presenta un festival Infantil-Hubenil riba e Plaza cu ta carga su nomber y cu e mesun esencia cu a cuminsa e Festival di Dande den añanan 70, esta mantene e cultura di Dande bibo.
Inscripcion y tiramento di lot
Banda y muchanan cu ta desea di participa por manda un email na [email protected] cu tur detayes, e.o. Nomber complete di participante, fecha di nacemento y edad, y nomber di e banda. Den caso cu e banda ta participando cu un composicion di fin di aña, mester pone tambe titulo di e cancion, nomber di compositor y areglista y tambe e ritmo di e cancion.
Tin luga pa maximo 40 participante participa. Inscripcion ta sera dia 20 di December. E dia aki lo tira lot tambe y pa e dia aki e bandanan mester tin nan secuencianan tambe cla pa publica.
Edadnan cu por participa ta:
- 4-6 aña
- 7-9 aña
- 10-12 aña
- 13-17 aña
Pa mas informacion por Whatsapp na 297-567-4090
Di awor aki ta invita un y tur pa presencia e festival aki, duna aporta y apoyo na nos hobennan y na nos cultura di Dande. Ay Nob’e!