E festival di buki pa mucha ta un culminacion di locual ta e parti mas importante di biblioteca, cual ta lesamento. E festival lo bay diferente sigur e aña aki mirando e situacion di Covid19, pero tog Biblioteca no ta keda sin haci e. Aña pasa caba el a cuminsa bay den un direccion digital pero e aña aki e ta completamente digital. Biblioteca Nacional tin e departamento di media a haci un transformacion masha grandi mes segun Yosmar Maduro-Sneek di Biblioteca Nacional ta splica nos, cual ta haci cu awor e ta posibel pa haci produccionnan, y hasta den futuro cercano podcast.
Biblioteca Nacional ta uzando nan plataforma digital awor unda e workshopnan a cuminsa caba, pasobra tur aña nan ta haci un curso pa docentenan di scolnan basico, kleuter y scolnan special. Pero awor tur cos ta Online. Dia 13 di October Biblioteca Nacional a cuminsa cu e workshops caba via nan Youtube.
E aña aki e tema di Festival di Buki pa mucha ta Historia, y e lema ta ‘Tempo di Mi Tempo’ cual ta un bunita lema cu por wordo uza pa hopi cos. E aña aki mescos cu tur aña, tin un buki cu Biblioteca Nacional ta laga traha unda ta invita algun escritor pa forma parti di dje. E buki Ora Ubao – Schelpeneiland ta esun en cuestion, na unda e escritornan invita ta dos di Hulanda y dos di Aruba: Liliana Erasmus, Robert Reeberg, Jeroen Hoogerwerf, Lizzy van Pelt, e ilustracionnan ta haci door di Elvis Tromp.
Bo no por cumpra e buki aki, Biblioteca Nacional ta entrega esaki na tur scol na Aruba un cantidad. Normalmente ta keda den mesun liña cu e mesun temanan cu Hulanda ta uza, ta adapta esaki na nos cultura of enseñansa y e aña aki ta Historia. E unico forma cu un otro persona por haya e buki aki ta door di bay na un di e boekhandelnan cu ta participa; De Witt Stores y Plaza Book Shop, bo ta cumpra un otro buki y bo ta haya esun aki regalo.
Durante e siman di buki, cual ta 2 pa 6 di November, ta e siman cu normalmente autornan di e buki ta bishita e scolnan, esaki lo pasa e biaha akinan pero digitalmente. Tur dia lo tin un presentacion Online di e autornan pa e scolnan. Durante e siman aki lo tin autornan di Aruba cu lo haci Live sessions na e dos bibliotecanan cual lo bay Live via Biblioteca su Facebook.