Durante conferencia di prensa na Biblioteca Nacional a duna informacion riba e siman di buki pa mucha cu e aña’ki lo tin como tema “Viaha y Goza” cu pa di 27 biaha ta wordo organiza. Directora di biblioteca nacional Sra. Astrid Britten a duna informacion cu e siman di buki di mucha lo cuminsa Diabierna 1 di November, 2019 y ta tuma luga na Cas di Cultura. E programa mes ta cuminza 6’or di atardi pero ya for di 5’or di atardi tur e boekhandelnan cu ta participa na e festival di buki aki y tur esnan di Biblioteca caba lo tey pasobra porta ta habri e ora ey caba.
Sra. Britten a declara cu ta sumamente contento cu lo tin e autor local y kende ta trahado tambe di Biblioteca Nacional, Sr. Richard Dabian kende a traha e storia “E Faro di Multi Color”. Biblioteca Nacional ta sumamente contento cu Sr. Dabian ta parti di e festival di buki e aña’ki y ta duna asina un bunita oportunidad pasobra na Augustus ultimo Biblioteca Nacional a para keto na e hecho cu ta celebra 70 aña cu e trabao di biblioteca. Sra. Britten a sigui bisa cu manera tur aña tin un cantica y esun di e biaha aki ta “Ban Keiro”. E cantica aki ta composita dor di Zulaika Geerman. Sra. Nataly Croes ta splica riba e apertura y clausura di e Festival di Buki di Mucha 2019 y ta informa cu e apartura ta Diabierna 1 di November y esaki lo cuminza den forma di un fiesta pasobra Biblioteca ta wak esaki di ta un fiesta pa nos muchanan. E programa ta cuminza for di 6’or di atardi pa 8’or di anochi na Cas di Cultura. E actividad ta combina cu un mercado di buki caminda e boekhandelnan ta presenta pa bende diferente buki pa mucha y esnan cu lo tey ta Van Dorp, De Witt, Plaza Book Shop y Bruna.
Sra. Croes a menciona cu e buki di e festival di buki lo wordo reparti gratis cu compra di un buki na balor di 25 Florin of mas serca un di e boekhandelnan. Pues mayornan probecha di e oportunidad aki y cumpra un buki y asina haya e buki di e Festival di Buki 2019. Pa loke ta e programa pa e atardi aki lo bai tin presentacion di Puis X School cu lo haci e gran apertura di Festival di Buki 2019. Tambe lo bai tey Kitay De Jong kende lo canta un cancion y tambe lo tin presentacion di Pierewietje. Pues un invitacion pa mayornan pa trece e muchanan presencia e gran apertura di Festival di Buki 2019. Tambe t’asina cu den sala di Bibliotheek tin un bunita exposicion cu a wordo haci dor di Departamento di “Catalagus” cu tin e lema di “Ban Lesa Viaha y Goza”. Sra. Croes na mes momento kier a bisa cu lo tin e clausura cu lo ta e siguiente siman Diabierna dia 8 di November for di 6’or di atardi pa 8’or di anochi na Prinses Amalia Basis School. E school aki ta encarga cu clausura y ta invita tur hende pa trece e muchanan pa nan goza di e evento grandi aki caminda tin un bunita show hinca den otro. Mester bisa cu tur e autornan lo ya presente tanto na e apertura como e clausura di Festival di Buki 2019 y asina e muchanan y tur hende por sera conoci cu nan y por hasta pidi nan firma pa nan buki preferi.