Festival di Arte y Cultura den Caya Grandi na Oranjestad

Fundacion Muchila Creativo y Departamento di Cultura Aruba, Ministerio di Cultura y Ministerio di Enseñasa ta organisando e Festival di Arte y Cultura den Caya Grandi riba diasabra 29 di October for di 4’or di atardi te cu 10’or di anochi. Esaki den cuadro di luna di enseñansa.
Un diasabra di famia cu actividadnan artistico den cinco zona, tanto di musica, baile, teatro, arte visual, multimedia, canto y mas. Tambe lo tin tayernan gratis caminda e publico ta bira participativo durante e actividad aki.
Riba Plaza Daniel Leo lo tin Caha di Orgel, Steel Pan, Music Box cu Matthijs Spaltman di Corsou, y Djembe Jam;
Riba Caya Betico Croes lo tin Grupo Folklorico, Abada Capoeira, Tango Dance y Grupo Empire y Pachanga Aruba lo bay tin presentacion y demo;
Na e Pleinchi banda di Aruba Bank lo tin weganan di teatro cu Jhon Freddy Montoya y hunto cu e maestro y actor profesional, sr. Omar Bilboa y actrisnan profesional, Lia Querol y Lizandra Arteaga, kende ta profesora di teatro, kendenan a bini for di Cuba na Aruba pa e Intercambio Teatral 2016.;
Dilanti Bon Bini y Ex-Benetton lo tin e parti di Arte visiual guia pa Frans Lacle cu pintura riba canvas y King Lie Kwie lo duna oportunidad pa traha maraca cu calabas. Na ex-Benetton na comienso di caya lo tin e artista di Airbrush sr. Richard ‘Chatty’ Tromp, kende lo crea obra riba muraya;
Na sede di Fundacion Muchila Creativo lo tin tayer di multimedia duna pa Rebecca Roos;
Tambe lo por traha Jingle cu Idris Boekhoudt …
Bo no mester duda pa parkeo, pasobra Arubus/Aruparking a coopera na e bunita proyecto aki cultural. E parkeo lo ta gratis for di 4’or p.m. en adelante. Durante di e festival aki e tram lo core tambe.
Pa 7’or di anochi lo tin un parada cu drum band ‘Prodigy’ di hende muhe so cu ta cuminsa na Plaza Daniel Leo y caba na Plaza Nikki Habibe. Tur esnan cu a tuma parti na tayer di baile, trahamento di instrumento y maraca lo por join den e parada di drum band riba ritmo di ‘Prodigy’ cu nan obranan.;
Riba Plaza Nikki Habibe lo tin presentacionnan manera;
Muchila Houseband
Open Podium
Muziekschool
Karaoke.
Tambe lo tin pa mucha e Disney World 2 Dino Jump y benta di popcorn y cotton candy.
Mirando cu e ta un actividad pa famia lo tin tambe tentnan di cuminda crioyo, boca dushi y artesania. Pa kita sed y refresca lo tin 2 tent cu lo ta na encargo di ‘Mary Joan Foundation’.
Banda di tayernan cu ta completamente gratis tin animacion y tambe lo tin open podium na unda por presenta bo talento.Como clausura lo tin e Karaoke riba Plaza Nikki Habibe bou direccion di Julio Wever.
Fundacion Muchila Creativo y Departamento di Cultura Aruba ta invita e pueblo di Aruba pa bini apoya, participa y gosa un diasabra di famia durante e Festival di Arte y Cultura den Caya Grandi di Oranjestad.

102916arteycultura_640x456

Comments

comments