Fuerte disturbio a tuma luga e anochi di diasabra na Den Haag, Hulanda, despues cu a registra confrontacion entre grupo rival durante un festival Eritreo (Festival Eritreo ta un celebracion cultural cu ta tuma luga na Eritrea, un pais ubica den Hoorn van Africa), segun por a aprecia den un serie di video comparti riba red social y e medionan local ta informa.
E festival – describi como un fiesta di Aña Nobo – a wordo organisa den e centro di negoshi Opera p’e Eritreonan, partidario di e gobierno di nan pais, pero un grupo di opositor di e asina yama Brigada Nhamedu, a acudi n’e evento y a cuminsa cu e confrontacion.
“Nos coleganan a enfrenta un violencia hopi grave cu a cuminsa di nada. Esaki ta inaceptabel,” hefe di polis local, Marielle van Vulpen, a declara. E disturbio a resulta den cuater agente herida y varios persona deteni.
Algun causando di desordo tabatin palo, otro tabata tira piedra y tabatin un cu a cende auto y tambe un bus na candela. Tambe nan a kibra bentana di varios cas y a daña un banki, lagando e caminda yena di glas kibra y piedra, hasta a yega na ataca e trahadonan di e servicionan di emergencia.
Varios testigo ta sigura cu e zona tabata parce un campo di bataya. Di acuerdo cu un hende muhe cu a presencia e echo, algun di e buscadonan di pleito a acudi na un stacion di gasolin pa yena boter cu gasolin y uza nan como Molotov cocktail.