AZV ta den ful preparacion y ta eingelijk bezig cu tur e comisionan cu ta trahando riba esakinan. Y mester bisa cu e ta hopi satisfecho cu e acohida cu el a haya pa su Aruba Health Fair y pa cu esaki nan a ricibi hopi apoyo di diferente companianan den comunidad y tur cos ta canando hopi bon. E evento aki lo bai tuma luga dia 8 di Juni riba un Diasabra for di 4’or di atari te cu 10’or di anochi y for di aworaki caba, henter comunidad di Aruba ta keda invita pa bin e evento y haya sa mas di kico tin den e mundo di salud. A scohe pa riba un Diasabra p’asina hopi famianan cu tin e oranan liber ey mas facil por pasa na e evento y tuma tempo pa sa mas. E lo tuma lugar na oficina principal di AZV na Camacuri, adres ta Rumbastraat 21 y lo bai tin ful un area paden di e edificio caminda lo tin un escenario principal, lo tin entrenimento di bandanan conoci manera Delicious, Tsunami y N-Fusion y tambe lo tin diferente orador cu lo bai presenta diferente topico riba salud pues tin un programa bastante amplio y tur hende ta invita p’asina bin scucha y conscientiza bo mes riba e desaroyonan den e mundo di salud akinan na Aruba y tambe kico ta e plannan pa aki cinco aña. Pues e focus mas grandi di e Feria di Salud aki ta pa papia riba e situacion actual y kico por spera aki cinco aña tanto di AZV, di Hospital, di Centro Medico San Nicolas y di tur e partnernan den ramo di salud. Pasobra esaki ta di sumo importancia.
Banda di esaki, Solange Tchong, di AZV, kier recorda tur hende cu ticketnan ta disponibel caba y prijs ta solamente 5 Florin y por haya esaki na tur oficina di AZV cuta habri di Dialuna pa Diabierna di 7.30 di mainta pa 4’or di atardi. Importante ta pa e bishitante registra, pues bo ta cumpra bo carchi y bo ta activa esaki di biaha riba e website di AZV, esta www.azv.aw y e ora bo ta activa bo ticket. Ta importante haci esaki pasobra ora bo registra bo lo participa pa gana diferente premio pero tambe eynan bo lo haya chens tambe pa inscribi pa e diferente seminarionan disponibel. Por ehempel lo tin en total 12 seminario, y cada un di nan tin cupo pa 40 persona y pesey ta hopi importante pa registra pa bo reserva bo cupo. Algun di e topico di seminario ta Cuido di Herida, Diabetis, Prevencion pues hopi otro topiconan mas y sumamente interesante. Tambe lo tin seminarionan di con pa Cushina Saludabel pues pa e motibo aki ta sumamente importante pa busca bo ticket y registra esaki. E programa ta bai ta largo, lo bai tin hopi actividad y ta importante pa sa tambe cu tur mucha bao di 16 aña ta drenta gratis, kiermen mayornan boso por bini cu jiunan. Tambe lo tin diferente organizacion deportivo presente hunto cu IBISA caminda lo ofrece informacion y demostracion di diferente ramo di deporte. Oficina principal di AZV na Camacuri lo wordo transforma den un Feria di Salud y esaki ta e oportunidad pa no solamente AZV jega serca di su aseguradonan pero pa comunidad tambe haya informacion y educa boso mes riba cuido medico na Aruba. Mas cu claro riba e website di AZV bo ta haya tur informacion p’asina bo por programa bo bishita na e Feria di Salud y haya sa cua ta e orario di cua seminario cu abo lo kier asisti na dje. Pesey ta importante pa registra bo ticket y na AZV mes tin un computer destina pa esaki specificamente. Di parti di AZV mes lo bai tin presentacionan pues si bo kier haya sa mas kico ta come bebe di bo aseguro serca AZV, esaki ta bo oportunidad pa haya tur informacion y mas cu claro tambe lo tin personanan cla pa contesta cualkier pregunta of incertidumbre cu cualkier asegurado por tin.