Cuerpo di Bombero kier pa e pueblo ta mas consciente, y paga tino pa e parti preventivo. Sr. Ferdinand Ponson, vocero di Cuerpo di Bombero ta amplia mas ariba e parti preventivo pa Carnaval.
Si ta bay laga cas so, si tin sistema di alarma of no, haci un checklist di kico mester haci. Ta pidi pa zorg pa tur cos ta desconecta pa no tin nada pa lamenta despues di Carnaval.
Segun Sr. Ponson, den pura pa bay Carnaval, hopi biaha hero di strica, bela ta keda cendi of stoof cendi. Ta pidi pa cera e boter di gas. Kita tur loke ta electronico pa wordo kita.
Ora hendenan ta bay Carnaval, ta parecido na temporada di Campamento of temporada di Fin di Aña. Ta pidi pa e cas ta bon cera, zorg pa tur cos ta na ordo, pa preveni cualkier incidente.
Cuerpo di Bombero ya caba a palabra cu Cuerpo Policial, cu si tin auto ta blokia e caminda unda cu e truck di Bombero mester pasa, lo busca tur manera pa e truck por pasa toch. Durante parada di mucha, tabata tin 2 truck para canta di caminda, banda di Bibliotheek, y e otro den un otro zone cu ta wordo cera y Cuerpo di Bombero no por brinda apoyo cu si algo mester pasa. E biaha aki lo zorg pa esaki no pasa un biaha mas.
Gran parti di e ruta, tin hende ta uza BBQ pit, y Cuerpo di Bombero ta purba di bay duna recomendacion. Pero ora di uza BBQ pit, zorg pa tin extinguidor y zorg pa no tin nada flamable, y no laga mucha yega cerca di esaki. Si ta BBQ pit ta di carbon, deshaci di e carbon na un manera eficiente. Y si ta uza boter di gas, ta pidi pa no pone e boter di gas den auto, den e solo cayente.
Por ultimo, Sr. Ponson, vocero di Cuerpo di Bombero, un conseho cu e kier a duna na e comunidad, ta pa preveni, pa no tin mester di lamenta despues.