FEPO, conhuntamente cu Quota International, Aruba Hearing Institute y Dr. Cabenda a organisa un anochi interesante na Universidad di Aruba na unda cuater orador a duna cuater diferente charla tocante Implante Coclear.
Den e siman di 30 di Mei te cu 3 di Juni, operacionnan Implante Coclear a tuma lugar na Aruba. Pa varios aña caba e operacionnan ta tuma lugar na Aruba. Pa cu esaki Prof. Dr. R. Stokroos, Sr. Lucas Lehning y diferente otro persona a bishita Aruba den e siman ey. FEPO a organisa diferente actividadnan y a probecha di e presencia di e personanan aki pa informa pueblo di Aruba tocante e ultimo desaroyonan di Implante Coclear.
Prof. Dr. Robert Stokroos, KNO arts na UMC na Maastricht, Hulanda a habri e anochi aki. Desde 2011, Prof. Dr. Stokroos ta bishita Aruba tur aña pa, hunto cu Dr. Cabenda, haci e operacion di Implante Coclear. E anochi aki, Prof. Dr. Stokroos a duna un presentacion hopi interesante tocante e ultimo desaroyonan medico den e area di Implante Coclear. El a conta cu awor na ta opera y e oido cu e pashent tin ainda ta keda. Antes esey no tabata posibel. E parti mas remarkable den su charla tabata cu nan ta traha riba “haarcel regeneratie” na unda nan ta crece cabeynan di oido den laboratorium pa despues implanta nan den horea pa asina un hende por tende atrobe. Un desaroyo hopi interesante pero e ta pa futuro e ta.
Despues a sigui Sr. Lucas Lehning, Senior Regio Manager di e compania MEDEL, un di e companianan cu ta ofrece aparato di Implante Coclear. Den su presentacion Sr. Lehning a amplia riba e ultimo desaroyonan den e area di e aparato. (e processor y e implante) Ela conta un tiki di e historia di e implante y el a demonstra esun presente con un hende cu un implante cochleair ta scucha sonido.
Despues di pause, Dr. Cabenda, KNO arts como tambe e persona cu a tuma e iniciativa hunto cu FEPO y Aruba Hearing Institute, pa e proyecto “Implante Coclear na Aruba”, a bin na palabra. Den su presentacion el a papia tocante su experiencia cu e operacion di implante coclear na Aruba y e resultado audiologico despues di operacion. Dr. Cabenda a mustra cu e resultado ta hopi bon y sigur un base pa sigui cu e operacionnan pa esnan cu a bira sordo.
Pa clausura di e anochi, Drs. Kristel van Nes, logopedista / linguista di FEPO a duna su presentacion tocante su experiencia pa cu e revalidacion di adulto y muchanan cu implante coclear. Sra. Van Nes a presenta e resultado di e revalidacion y a conta tocante e problemanan cu e encontra. Ela splica e importancia e papel di e famia rond di e mucha cu un implante cochlear. Si e situacion na cas no ta bon e por ta un problema grandi pa e revalidacion.
Tabata un anochi hopi interesante.
Un danki grandi pa e 4 orador pero tambe na Quota International cu a haci e anochi aki posibel.
Y cu esey Quota International of Aruba ta sigui pa yuda nos communidad. Hunto, nos ta logra hopi y hunto nos ta logra cosnan grandi pa esnan cu tin mas mester di dje den nos comunidad.
Keda pendiente pa mas informashon over di nos campaña “Cuida Bo Oido” cu lo start den e luna di September 2016.
Quota International of Aruba ta un organisacion boluntario di ehecutivonan femenino y cu ta dedica na mehora calidad di bida di esnan menos afortuna den nos communidad, especialmente esnan cu problema di oido y habla y tambe ta sostene hopi programanan pa hende muhernan den dificultad y muchanan desafortuna. Alabes Quota ta hiba e mensahenan di concientisacion den nos comunidad por medio di proyectonan organisa pa hobennan na scol, seminarionan pa nos comunidad y en general trahando hunto pa brinda un miho calidad di bida.