Tur aña un comision nomina door di Minister di Deporte consistiendo di representantenan di diferente instancia di deporte manera IBiSA, Lotto, ASU como tambe nos reporteronan deportivo di corant, radio, website y television ta bin hunto pa escoge nos miho atletanan cu a destaca den e aña deportivo cu a transcuri, e aña aki 2016. Un trabou cu sigur no ta uno facil mirando e tantisimo nominacionnan cu mester wordo analisa conhuntamente cu e logronan di e atletanan cu a destaca den aña menciona. Ya pa varios siman e Comision encarga ta bin hunto pa asina evalua tur informacion y comentario ricibi di e Federacionnan Deportivo pa a lo largo deposita nan voto di preferencia segun e criterianan. Pa loke ta e votacion pa e atletanan di aña 2016, e huradonan un bes mas tabata tin e tarea dificil ya cu cada un a haya e oportunidad di defende su escogencia y hiba esaki den forma di discusion y evaluacion. Mester corda si cu e huradonan a traha a base di e informacion ricibi di e diferente federacionnan cu ta manda nan atletanan nomina. Na final a vota den forma democratico pa asina saca e ganadonan.
Den Premio Excelencia di Deporte 2016 por a vota den nuebe categoria mientras e Comision lo rindi tambe homenahe na algun figura deportivo, manera por ehempel directiva, entrenador, coach, referee of umpire cu a sobresali den deporte of ta duna su tempo y dedicacion na deporte.
E aña aki un total di 21 di e 34 federacion deportivo na Aruba a reacciona den forma positivo y a nomina nan atletanan den e diferente categorianan pa e Premio Excelencia den Deporte 2016. Mester bisa si cu esaki ta 1 federacion menos cu aña pasa. E Federacionnan Deportivo cu a nomina nan atletanan ta Aruba Little League, Atletismo, Ahedrez, Softbol, Taekwondo, Judo, Volleyball, Tenis de Mesa (Ping Pong), Biyar, Beach Tennis y Tennis, Basketball, Kendo, OCA (Caballista), Pesas, Triathlon, Gymnasia, Esgrima, Body Boarding, Sailing, Landamento y Landamento Sincronisa y Special Olympics Aruba.
Diabierna 24 di Maart pa 7or di anochi den e mahestuoso ballroom di Aruba Marriot Resort and Stellaris Casino, Aruba lo conoce su Atletanan di Aña 2016.