E sistema di ranking ta uno hopi importante pa e federacion di tennis di mesa, esta Aruba Table Tennis Association unda hungadornan tin cu lucha cada torneo pa keda halto den puntuacion y posicion pa asina e representacion den exterior por ta mas cu bisto na fabor di esnan cu ta sobresali. Den e ultimo añanan por a ripara cu esaki a yuda masha hopi unda e atletanan ta hasi nan maximo esfuerso pa matene of mehora nan nivel pa asina duna un miho bataya na nan contrincantenan mas cercano pa a lo largo bira e number uno den nan categoria.
E competencia aki sin duda ta uno sano y e mayoria ta haya e oportunidad pa midi nan nivel den exterior esaki den torneonan renombra den region y continente. Aruba Table Tennis Association lo sigui hasi nan maximo esfuerso pa cumpli cu nan atletanan organisando torneonan individual y team esaki tanto na Santa Cruz y San Nicolas.
E torneo di ranking ta cana segun schedule unda nos a haya den e categoria U-18 un prome luga ta wordo ocupa pa Jeandry Mathilda, e di dos luga pa Chingho Chung y e di tres luga pa Johnatan Paredes. Den e categoria A Klas, Mario Lobo a keda na prome luga mientras Andy Gomes a keda na di dos luga y Jeandry Mathilda a keda na di tres luga. Den e categoria B Klas, nos ta haya na prome luga James Letren, na di dos luga a keda Franklin Lopes mientras na di tres luga a termina Wing Chow Leong.
Mester bisa cu e ranking ta e penultimo torneo di aña. Otro siman lo inicia e torneo di mas importante di aña pa clausura e temporada 2018 di tennis di mesa ora cu e hungadonan lo bataya pa e premio maximo den e Copa Aruba.
Stichting Sportsubsidie Aruba ta contento di por aporta y brinda e ayudo necesario na e federacion di tennis di mesa pa cu nan campeonato di ranking 2018. Stichting Sportsubsidie Aruba a yuda subsidia e campeonato di tennis di mesa den su totalidad.
Lotto, e loteria di Aruba ta ofrece diferente weganan manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana.
Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.