Durante di e Asamblea General di Comite Olimpico Arubano, e miembronan presente mester a para un rato pa un momento historico pa asina eligi un miembro nobo cu lo forma parti di e famia di COA. Secretario general di COA, sra. Nicole Hoevertsz a elabora un poco riba e historia di e federacion di gimnasia na Aruba kendenan a haci un apelacion pa bira miembro nobo di COA. Mester bisa cu despues cu tur presente a scucha e resumen di dicho federacion esnan presente unanimamente a acepta e federacion di gimnasia como miembro nobo.
Mester bisa cu for di aña 1984 a lanta e prome club di gimnasia na Aruba, esaki conoci como Club Gimnastico Arubano AVANSE (CGA Avanse). Durante transcurso di e añanan, e deporte di turnen a conoce su bon y menos bon temponan. E club a persevera y na 2014 a celebra su di 30 aniversario. Entrenadornan cu tabata forma parti di CGA Avanse ta entre otro sr. Armand Hessels, sr. Glenn Lande y sra. Pamela Postuma.
Den luna di Augustus di 2015, e gimnastanan di e seleccion di Aruba pa prome biaha a atende un competencia na nivel internacional esaki den e XI Copa Panama Classic na Panama. Remarcabel ta cu e competencia a bira uno satisfactorio pa e federacion mirando cu nan logra obtene no menos cu 37 medaya den nan prome aparicion internacional. Mirando e exito aki den transcurso di e dos añanan cu a pasa, e seleccion di gimnasia a competi den varios evento internacional na entre otro Trinidad & Tobago, Panama y Puerto Rico.
E directiva, staf y personal di Comite Olimpico Aruba como tambe e demas miembronan kier a yama un caluroso bon bini na e federacion gimnastico Arubano como nan miembro nobo.