Ya pa varios aña e federacion di ahedrez di Aruba ta wordo invita pa participa na e torneo di ahedrez Srefidensi Chess na Surinam. Pa e motibo aki, e dianan 21 pa 28 di November proximo, un delegacion den e deporte di ahedrez lo biaha pa Surnam unda nan lo bay competi den e di cuater edicion di e torneo Srefidensi Chess. Henter e torneo lo ta en conexion cu e celebracion di e Dia di Independiencia di e pais Surnam y esaki mas cu claro lo wordo celebra cu varios actividad deporte na Paramaribo. E delegacion cu lo representa Aruba lo consisti di e dos hungadornan Brain Diaz y Octavio Croes cu lo competi den e categoria di Open. Na banda di Aruba lo tin varios otro paisnan bisiña cu a confirma nan participacion. Mester bisa cu e intercambio entre Aruba y Surnam den e deporte di ahedrez ta uno masha solido. Sigur un bes pa aña ambos pais ta bishita torneo di otro. Luna pasa e pais di Surinam a bishita nos isla unda nan a competi den e torneo Aruba Chess Challenge.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di ahedrez pa e di cuater edicion di e Srefidensi Chess na Surinam
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.