Den e fin di siman cu a pasa, Federacion di ahedres di Aruba a start cu su segundo edicion di su Campeonato Nacional di Aruba. Aña pasa e hoben Mark Bueno a gana e torneo aki y a bira nos prome National Master. E aña aki, e no por ta presente door di su estudio na Hulanda.
Segun e formula, e miho 10 hungadornan di Aruba a wordo selecciona pa participa den e campeonato aki.
Hungadornan cu a acepta e invitacion y a participa na e segundo edicion aki ta:
Woman Fide Master (WFM) Maria Diaz
Candidate Master (CM) Octavio Croes
Candidate Master (CM) Jose Pesqueira
Angel Centeno
Candidate Master (CM) Jomar Benschop
Enrique Jacopucci
Brian Diaz
Woman Candidate Master (WCM) Zaily Arbona
Hubert (Randy) Tromp y Daniel E. Diaz.
Tur 10 hungado lo topa otro den 2 weekend di tempo.
E prome weekend cu ta tras di lomba, e prome 5 rondnan a wordo hunga.
Diabierna awor pa 8:00pm e di 6 rond lo wordo hunga.
Y diasabra 8 April pa 2:00pm e di 7 rond y pa 8:00pm e di 8 rond.
Diadomingo dia 9 di April e ultimo rond lo wordo hunga pa 11’or di mainta.
Tur wega lo wordo hunga den e edificio di SIMAR na Sabana Blanco.
E pairing nan ta fiha desde comienso, asina tur hungador sa, adelanta kende nan lo bay topa cu cual color y riba ki fecha. E torneo aki ta un torneo valido pa rating internacional. Y como arbitro a invita Ulises Hernandez di Venezuela.
Despues di e prome 5 rondnan, tin na cabes e hungado mas hoben den e seleccion aki, Brian Diaz. Brian tin actualmente 15 aña di edad.
Brian a score den e prome 5 rondnan 4 ½ punto.
Na di 2 luga, nos tin un empate entre Jomar Benschop, Angel Centeno y Octavio Croes. Nan tur 3 tin awor 3 ½ punto.
E weekend venidero lo bay bira uno masha interesante mas. Mayoria di e top-hungadonan no a topa otro ainda. Nos por haya un ganado cu actualmente no ta den e prome 4 luganan?
Kende lo bay bira nos Campeon Nacional e aña aki? Diadomingo dia 9 di April esaki lo ta conoci.