Feca ta organisa tayer: Siňa bo Yui Respet y Wordo Respeta

Diamars venidero dia 2 di maart, Fundacion Educador Consciente Aruba (FECA) ta organisa su segundo tayer pa mayornan cu e tema: Siňa bo Yui Respet y Wordo Respeta.

E promer tayer cu a tuma lugar na februari tabata un exito y a enfoca riba e tema “Keep Your Cool”, unda a siňa mayor con pa keda trankil durante momentonan di pleito y tension cu yuinan.

E tayer di 2 maart na Centro Bario Brazil ta siňa mayornan con nan tin cu papia cu nan yuinan pa nan sigui instruccionnan y cumpli cu nan tareanan manera a wordo splica. Alabes mayornan por yuda nan yui comunica cu otro mucha of hende ora un persona no ta respeta e mucha su limitenan.

Psicologo y miembro di directiva di FECA Helen Guda ta splica:

“Den nos cultura e ta importante pa siňa nos yui e balor di respet, y hopi hende ta mira respet ora mi bisa mi yui pa haci algo, e ta haci’ele tambe. Den e metodo di Disciplina Consciente (Conscious Discipline®), nos ta siňja mayornan con pa papia y con pa yuda nan yuinan cumpli cu nan instruccionnan sin uza miedo, negociacion of cumpramento di yui, pero enfocando riba habilidadnan manera coneccion, comunicacion cla y asertivo y mustr’ele visualmente bo expectivanan”, ta comenta Helen Guda.

Fundacion Educador Consciente Aruba a wordo lansa na november 2019 y tin como meta pa contribui na un desaroyo social emocional saludabel di nos muchanan ofreciendo conocemento y practica di Disciplina Consciente na tur mayor, educador,y comunidad en general.

E tayer di Siňa bo Yui Respet y Wordo Respeta ta tuma lugar na Centro Bario di Brazil, diamars 2 di maart di 7pm -9pm y ta costa Afl 25. Pa registra por whatsapp 560-0679 of mail [email protected]
Pa mas informacion por bishita e Facebook page: www.fb.com/educadorconscientearuba

Comments

comments