Falta solamente dos torneo mas di clasificacion pa mira ken lo representa Aruba den e Pan Americano di biyar cu lo tuma lugar den luna di augustus proximo na Argentina. Den e weekend binidero riba dos dia esta e dianan 8 y 9 di juni lo tin e campeonato nacional di Bola 10, un competencia crucial pa loke ta e ranking di biyar faltando un competencia mas pa bay. Aña pasa, e hungador Gunnar Leonard a a finalisa dilanti di Marc Farro cu e keda na di dos luga, Angelo Tromp na di tres lugar. Con e lo ta e anja aki ta hopi interesante mes mirando cu e hungadornan Gunnard Leonard y Marc Farro ta lidera e tabla di posicion te na e momentonan aki cu 340 punto sigui pa Richard Wolff cu 290 y net su tras Martin Apeldoorn cu 240 punto. E prome tres hungadornan ta gana e derecho di representa Aruba den e Pan-Americano di biyar. Dos siman despues pa ser exacto, dia 23 di juni proximo lo tin e ultimo competencia cual lo ta un clasificacion Bola 10 y aki tur cos lo keda defini.
Notable ta cu e disciplina di Bola 10 ta esun di mas complica den biyar mirando e grado di dificultad debi cu tur bala mester cay canta y den e secuencia corecto.
E dianan 30 di juni y 1 di juli, Aruba lo bira e cas di un torneo internacional di biyar esta e ABC team 8 ball & individual 9 ball den e Aruba Summer Challenge 2018. Aki e miho hungadonan di nos islanan ruman Corsou y Boneiro lo competi contra di e mihonan di Aruba.
Stichting Sportsubsidie Aruba tambe a yuda subsidia e torneo di biyar Bola 10 organisa pa e federacion di biyar Arubano, FEBIAR.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.