E Directiva di FCCA recientemente a nombra Sr. Giovani Anthony como nan Director nobo di Finansas y Asuntonan General y ya e ta eherciendo su trabou na e oficina principal di FCCA na Sabana Blanco.
Giovani Anthony ta un persona basta conoci entre e profesionalnan na Aruba. E tin un conocemento amplio, experiencia y sabiduría riba tereno di Accounting, Finansas Desaroyo di Projecto riba nos isla.
Giovani Anthony tin tur e calidadnan necesario pa contribui na e desaroyo di Fundacion Cas pa Comunidad di Aruba pa e proximo decada.
Sr. Anthony ta hopi optimista y ta contento di ta forma parti di e team di maneho di FCCA. “FCCA tin hopi potencial pa por crece aun mas como organizacion cu lo adapta na e necesidad pa vivienda di nos comunidad. E mercado di cas ta evolucionando y nos lo mester haci cambionan necesario pa e siguiente decada. Retonan mester cambia y bira oportunidadnan”., asina ela expresa.
Sr. Anthony simper ta cla pa siña y mehora su mes, pesei mes e ta asumi esaki tambe den su tareanan diario na FCCA. Compartiendo conocimento, cu un actitud ambicioso y pro-activo hunto cu e team di FCCA e ta convenci cu lo produci resultadonan tremendo pa e comunidad di Aruba y nan necesidad di vivienda.
Giovani Anthony ta expresa su mes cu pasion encuanto di su lugar nobo di trabou. “Mi ta hopi entusiasma pa por traha na FCCA, un institucion asina “hybrid” (cu multiple funcion). Desde planeamento, diseño, calculacion di gasto y valor di vivienda, financiamento, construccion, servicio di control di calidad, servicio di agencia di seguro, desaroyo di proyectonan residencial y di viviendanan social, mantencion, desaroyo di parcelanan y por ultimo te hasta percura pa trabou di seguridad social den e barionan. Esaki ta un lugar hopi unico pa traha!”
Anthony ta anticipa cambionan den futuro pa locual ta necesidadnan di vivienda, ta bai tin mas alternativa, sostenibilidad y casnan eficiente den gasto, rondona pa un paisahe cu mata local di Aruba, semper teniendo cuenta cu e gastonan di construccion y loke ta e valor di inversion.
Anthony ta wak e futuro na FCCA cu wowonan hopi positivo.