FCCA ta teniendo un accion di limpiesa cual a cuminsa algun siman pasa den otro bario. E siman aki a toca turno na Seroe Patrishi.
Sra. Irene Boezem di FCCA a splica cu varios ta e instancianan cu ta trahando hunto, e.o. polis, Bureau Leerplicht, CCA, Serlimar cu ta bezig cu 4 ploeg ta lantando e sushinan cu e habitantenan a haya oportunidad pa saca e sushi pafo pa haci nan cura limpi. Towing di Jean y Nagico ta bezig ta takel autonan cu no tin nan papelnan na ordo, y hiba nan pa un otro localidad. Esakinan no por keda ariba un tereno publico.
Ta hopi importante pa e habitante realisa cu e esfuerso cu FCCA a haci aworaki, ta uno pa cuminsa y haci’e di nan mesun banda. Tambe pa nan bin cu nan preguntanan dilanti. Tin biaha ta haya e habitantenan cu no tin e fondo financiero pa haci e trabaonan grandi, pero semper ta bon pa acerca y pidi yudansa. Importante ta tambe pa realisa cu esaki ta e bario unda cu nan ta biba, pa e ta limpi.
Esaki sigur ta hisa nan calidad di bida y p’esey ta importante pa tene e luga limpi. Ta den nan mesun man pa nan kita e stigmatisacion cu e bario tin caba.
Pa loke ta e cooperacion, Sra. Boezem a splica cu tin varios cu a firma e formulario pa asina tuma distancia di loke ta e autonan. Tin algun cu no a tuma distancia, pero ta na altura cu nan sa cu nan mester cumpli cu e rekisitonan pa haya nan auto bek. Pero si ta contento cu e habitantenan ta cooperando bon y FCCA ta orguyoso di wak e fruta di e accion aki.