Un fayo den un breaker durante trabou rutinario den planta di produccion di WEB, tawata e causa inicial pa e interupcionnan multiple di coriente ayera 22 di november. E fayo a trece un desbalance den produccion y demanda, unda e sistemanan di proteccion a saca 2 turbina y 2 boiler for di servicio na diferente ocasion. Den casonan asina operadornan mester por reacciona hopi liher pa por mantene e generacion di coriente stabiel. E compania di awa y energia ta ofrece su disculpa pa e inconveniencia cu comunidad a sufri ayera. Alabes ta informa cu e proyecto IGMS den futuro lo yuda operadornan maneha e produccion pa asina limita situacionnan di desbalance den produccion di coriente.
E situacion ayera a bira critico na momento cu tawatin un desbalance entre demanda y capacidad di produccion di WEB na e momento ey. Pa e motibo aki y pa evita cu full Aruba keda sin coriente, WEB no tawatin otro opcion di interumpi algun liña di ELMAR. Esaki a pone cu den oranan di mainta e areanan di Santa Cruz y Savaneta y parti merdia Noord y Oranjestad a keda sin coriente. Pa 3.50 or di atardi finalmente WEB y ELMAR a logra stabilisa e suministro di coriente.
Durante henter aña trabou rutinario di mantencion ta tuma lugar den plantanan di WEB. E trabounan aki ta esencial y ta consisti di reemplaso di ekipo y piesanan cu ta midi y controla e sistemanan di produccion. Considerando cu no por pone full e planta di produccion abou, e trabou rutinario tin cu sosode durante e produccion. Mayoria biaha clientenan no ta ripara nada di esaki.
E proceso di generacion y suministro di coriente ta consisti di operacion di entre otro boiler, turbina, generatornan RECIP, molina di biento y panel solar, hunto cu kabel pisa di coriente, transformatornan y substacionnan. Esakinan ta maneha pa operadornan di forma cu tur ekipo ta reacciona segun e demanda di coriente di nos isla ta cambia. Si diripiente e demanda subi of baha, operadornan mester por reacciona hopi liher pa por mantene e generacion di coriente stabiel. E proyecto di IGMS (Intelligent Generation Management System) lo facilita e maneho di e combinacion di ekipo di operacion. E proyecto lo keda cla den curso di aña 2018.