FAVI a tene actividad di “Braille Challenge Valentine’s Edition 2017”. E actividad aki a wordo organisa y dirigi door di Dessiray de la Cruz y Maria Alejandra Londoño, stagairenan di EPI sector “welzijnzorg”.
E atardi a cuminsa cu un bunita actividad en conexion cu dia di San Valentino caminda cu e muchanan a traha un bichi di amor. E seccion aki di obra di man tabata tin como meta pa e cliente ciego sigui e instruccionan duna y logra traha e bichi di amor.
Maria Alejandra ta conta: “ Mi experiencia tabata algo unico pasobra nunca mi a yega di traha cu hende ciego. Esaki tabata mi prome actividad y mi a siña cu e clientenan ciego por haci mas di loke nos ta kere. E enseñansa mas grandi pa mi ta cu e clientenan ciego ta agradecido cu bo ta tene nan na cuenta, y pa mi esey ta algo hopi valioso.”
E atardi a continua cu e gran competencia di Braille. E competencia aki ta un actividad cu FAVI ta organizando ya pa 3 aña. Sinembargo e ta un actividad existente cu ta wordo organisa na nivel internacional cu reglanan ya stipula. FAVI ta mantene su mes na e normanan oficial y internacional cu e meta pa huzga con bon e clientenan completamente ciego (cu ta usa e metodo di Braille) ta domina esaki. Pa FAVI su muchanan e “challenge” aki ta un actividad positivo pasobra nan mes por practica tur locual nan a siña: por ehempel traha den un termino di tempo (werktempo), postura di sinta na mesa (zithouding) y manera di trata cu e machin di Braille.
Durante e actividad e muchanan mester a haci diferente ehersicio cu e Braille typemachine entre otro dictado di palabra, dictado di frase. Tambe nan mester a lesa un texto y contesta preguntanan tocante e texto. Tambe a midi e tempo di lesamento di cada un y por ultimo nan mester a reconoce diferente obheto door di fula nan.
Dessiray ta conta: “E tabata un experencia nobo pa mi y di cual mi ta super orguyoso di por a forma parti di dje. Mi a siña hopi dor di e actividad aki manera con pa organisa un actividad y pa tene cuenta cu tur loke mester. Tambe di e muchanan mi a siña hopi door di observa con nan ta domina e Braille typemachine y con nan ta expresanan mes durante e evento. Mi ta contento cu mi a haya e confiansa di mi guianan di FAVI pa hinca e bunita actividad aki den otro.”
FAVI ta contento cu e resultado caminda nos a conoce un ganador absoluto y uno cu a bay cu e puesto di segundo lugar. FAVI su deseo ta cu den futuro e muchanan por competi cu otro paisnan pa asina demostra con bon nan por domina Braille.