E dia internacional di garoti blanco strepi cora ta 15 di October. E aña aki FAVI ta activo y ta duna e cliente e oportunidad di educa nos comunidad door di demonstra con nan ta uze.
Celebrando e logronan di nos cliente, FAVI a dicidi di hiba su clientenan visualmente incapacita pa un paseo educativo den caya grandi di Oranjestad cu nan garoti .
E grupo a reuni na Djiespi’s Place y a wordo reparti den 3 grupo. Cada grupo tabata tin su boluntario of guia pa supervisa y tambe educa.
E intencion di e garoti di guia ta pa e cliente por orienta y tambe mobilisa independientemente. Riba e mainta di practica, nos cliente a haci esaki bou supervision di boluntarionan. Mas cu claro e ta rekiri hopi atencion di un cliente pa e por haci esaki. Pasobra e tin cu uza su sentidonan di scucha, fula, hole y auditivo. Ta importante pa laga e cliente experencia su area su mes. E chens semper tey cu pia por hera of por pasa un incidente. Esey ta algo cu ta necesario tambe. E ta haci e cliente mas conciente di su habilidadnan y ta yude. Cada cliente den e practica di mobilidad ta siña conoce su mes y su desafionan personal. Nos tey pa guia, instrui y si algo inconfortabel sosode nos ta evalua y hacie di nobo. Asina nos por revalida.
Si bo mira nos ta keiro, corda stimula nos y bisa nos por! Cu e sosten di e comunidad persona cu limitacion visual lo sinti nan mes mas confortabel pa mobilisa.