FAVI ta sumamente contento, cu despues di basta tempo di delibera, busca informacion y prepara, ta bay tin inicio di su evento “Dinner in the dark”.
E proyecto cu a haya e nomber “Dare the Darkness” a logra bira un realidad danki na Feria Social y CEDE Aruba cu a pone fondonan disponibel pa FAVI por realisa e projecto piloto aki.
Dare the Darkness: Dare the Darkness ta un evento culinario unico na unda cu e invitado lo drenta den obscuridad completo y lo experiencia kico berdaderamente e ta nifica pa no por mira nada. Meta di e evento aki ta primeramente pa concientisa nos comunidad tocante di limitacion di bista. Tambe un di metanan den futuro ta pa recauda fondo necesario pa e Fundacion por cubri su gastonan operacional pa e por sigui brinda su servicionan.
Dinner in the dark no ta un concepto nobo. Na diferente parti di mundo manera New York, Canada, Inglatera, esaki ta wordo ofreci.
Dinner in the dark a inicia hopi tempo pasa , na momento cu un meneer di Switserland (ciego) tabata laga su invitadonan come cu wowo tapa pa nan por experiencia kico e ta sinti. Despues di esaki diferente forma a wordo introduci rond mundo.
E manera cu FAVI lo introduci esaki na nos comunidad, ta wordo haci pa prome biaha na Aruba.
Dianan 25, 26 y 27 di Augustus, lo bay tin e tres prome eventonan di Dinner in the dark. Como primicia, prensa a wordo invita pasobra nan ta aliadonan hopi importante pa por trece e mensahe na nos comunidad, despues e personanan clave di Feria Social y Cede Aruba lo bay experencia esaki y por ultimo e famianan di e hobennan di Feria Social cu a haci nos proyecto bira un realidad. Sin e aporte y ayudo di e hobennan nos proyecto lo no tabata posibel.
Despues di e tres dianan aki, FAVI lo evalua, pone extra detayenan y lo habri e evento pa publico.
Nos ta spera di curason cu e evento dinner in the dark lo bira un experiencia unico y por logra concientisa e comunidad kico personanan cu limitacion di bista ta biba cune diariamente.
