Awemainta FAVI tabata presente dilanti Talk Of the Town mirando cu ta Dia Internacional di Limitacion p’asina haci un actividad cu nan clientenan. E actividad aki ta pa demostra na comunidad cu personanan cu limitacion tambe ta forma parti di comunidad y nan merece nan puesto tambe den comunidad y mas ainda comunidad mester tin aprecio y respet pa e personanan aki. Den e caso aki e clientenan di Favi tin limitacion di bista pero nan tambe kier haci cosnan diario y nan tambe kier sali di nan cas pa goza di bida y pesey comunidad mester duna nan e oportunidad aki. Y awe mas ainda riba e Dia di Esnan cu Limitacion ta un forma adecua pa conscientiza comunidad riba e hecho aki. Sra. Charlene Marchena di FAVI a duna di conoci cu aunke cu e conscientizacion aki tey den comunidad pero toch ultimo tempo den diferente actividad por a tuma nota cu tin personanan cu no ta consciente di e garoti di e personanan cu limitacion di bista y cu e garoti aki ta nan forma pa “mira” unda nan tin cu bai. Tambe t’asina cu ora un auto dilanti para pa duna e personanan cu limitacion preferencia, toch esun su tras ta bini cu un velocidad toch halto y no ta respeta kico ta sosodiendo dilanti di dje. Y defacto no tin e pasenshi ey cu mester tin cu personanan cu limitacion vooral esnan cu limitacion di bista. Kico esaki ta nifica pa un persona cu limitacion di bista??? E personanan aki no tine facil pa cana lihe of riba e speed cu un persona cu por wak, ta cana bai dilanti pasobra e mester orienta su mes bon a base di loke e ta scucha p’asina e por sinti su mes sigur pa e dal e siguiente stap padilanti y sa cu e ta bayendo den e direccion corecto. Anto hopi biaha otro personanan no tin e pasenshi aki pa warda y duna preferencia na un persona cu limitacion y esaki ta algo cu mester cambia den mentalidad di comunidad. Pero toch e personanan cu limitacion aki di bista tin derecho pa hiba un bida toch wel normal y kier cruza caya kier cana liber y pesey un suplica ta bai na tur hende pa tene pasenshi cu esnan cu limitacion. Mester pensa con nos mes lo sinti si nos lo ta den e posicion di un persona cu limitacion con nos lo sinti ora un persona no tin pasenshi cu nos. Pa hopi tempo caba tin e problema pa cu infrastructura di nos pais pa cu personanan cu limitacion, specialmente esnan di bista, y akinan Sra. Marchena ta duna di conoce nos tur sa cu na paisnan mas desaroya manera esnan di Europa e infrastructura ta hopi “amigabel” pa hendenan cu limitacion y sigur ta consciente cu pa haci esaki Gobierno mester haci inversionnan cuantioso y e cantidad di personanan cu tin un limitacion di bista y cu ta registra na Favi ta di solamente 10 persona y loke ta registra eingelijk na Censo tambe. E importante ta toch cu personan cu ta na cas y tin un limitacion di bista pa registra nan mes pasobra Favi ta sigur cu tin un cantidad grandi di hende cu limitacion di bista pero pa berguenza no ta registra y esey ta haci’e toch dificil pa crea un “caso” pa urgi Gobierno inverti den un cambio di infrastructura p’asina e por ta acesibel pa personanan cu limitacion di bisa.