FAVI a celebra ´Dia di Garoti´ na un manera diferente e aña aki

FAVI

Dia di Garoti, cual tabata riba 15 di October, ta un dia unda ta celebra e importancia di e garoti pa e persona cu incapacidad visual.  E importancia di e garoti ta cu e ta simplemente e wowo di e clientenan, cu e garoti e persona ta detecta obstaculonan, si tin bahada of subida, pa asina e por mobilisa evitando obstaculonan cu por ta fatal den momento di translada su mes di un caminda pa otro.

E aña aki naturalmente pa motibo di COVID19, FAVI a organisa un accion diferente caminda nan a bay diferente parti di Aruba cu diferente cliente, grandi, mucha, hoben y adulto caminda nan ta haci demostracion di crusamento di caya. Sinembargo e aña aki, por medio di COVID19 manera nos tur sa, tur cos mester wordo adapta y ta diferente, FAVI a opta di tuma e accion aki diferente pa no pasa e dia aki bay sin logra organisa nada.

FAVI a celebra ´Dia di Garoti´ na un manera diferente e aña aki

Posted by MasNoticia.com on Friday, October 16, 2020

E tabata un excelente iniciativa cu ta produciendo tremendo resultado ainda segun Charlene Marchena, guia di actividad na FAVI, caminda a traha algun video y laga clientenan mes cu tin acceso traha nan mesun video pa asina publica esakinan riba pagina di Facebook di FAVI.  Riba nan Facebook bo por tuma nota diferente video di clientenan con nan ta haci uzo di garoti y na unda, den e caso aki a cuminsa dia 5 di october y lo continua cu ne tanten cu nan ta hayando video cu meta pa conscientisa comunidad di Aruba.

´E mundo virtual ta un mundo moderno cu ta crea entusiasmo, pasobra no ta djis un accion cu ta pasa e momento ey anto e ta disparce, sinembargo e ta un accion cu ta keda riba rednan social caminda cu nan mes ta sinti hopi entusiasma di esaki´, sra. Marchena ta bisa. Den un siman di tempo FAVI a haya casi 9 video pues e entusiasmo ta grandi.

Pa e resto di aña aki FAVI ta bay sigui conscientisa. Nan lo tin un accion di donacion cu tin actualmente tambe coriendo for di Augustus y lo bay te cu December. E donacionnan sigur ta necesario pa sigui na brinda e diferente servicionan manera di computacion, les di educacion fisico, y diferente otro lesnan cu ta wordo crea na peticion di cliente. ¨Nos ta siña nan haci diferente cosnan riba nan mes pa asina nan tambe por biba un bida mas independiente¨, segun sra. Marchena. Por yama libremente na 582 5222 of 582 5051 pa esnan interesa den haci un donacion.

Mester tene cuenta cu nos hendenan cu incapacidad visual
Segun cifranan di CENSO di 2010, cual ta awor 10 aña pasa, nos tin alrededor di 3,100 persona cu un incapacidad visual. Sinembargo, FAVI tin mas o menos 360 persona registra den su fundacion. Esaki no ta algo straño, e ta mas o menos 10% di e populacion di hende cu tin problema di bista, segun Charlene Marchena, guia di actividad na FAVI ta informa Masnoticia. Esaki ta debi cu hopi persona ora di tin problema di bista, ta busca otro alternativanan pa por yega na solucion pa mehora nan bista.

No solamente riba Dia Internacional di Garoti, pero tur dia di aña, FAVI ta suplica comunidad di Aruba pa ban tene cautela riba caya. Si bo ta un conductor y bo ta mira un persona cu su garoti cu kier crusa caya, dun´e un oportunidad. Como automobilista, dun´e un pitro y bis´e pasa numa anto percura pa bo wak cu otro banda di trafico tambe ta sigur. Na personanan cu ta cana riba caya, ora di mira un persona cu un garoti blanco strepi cora, no spera cu un persona lo mira bo y hala un banda, evita di haci cu e lo bay trompeka y sinti insigur, hala un banda respectivamente pa e persona por sigui cana.

Comments

comments