BOGOTA, Colombia – E guerilla Colombiano di FARC a tuma e prome paso pa converti den un partido politico. Diahuebs, un grupo di representante eligi pa FARC a registra na Conseho Nacional Electoral (CNE).
FARC lo opera den congreso bao di e nomber Vocez de la Paz. Riba su cuenta oficial di Twitter, e agrupacion a splica su obhetivonan.
E partido politico aki no ta componi pa miembronan di FARC. Den un comunicado, e guerilla y Gobierno di Colombia a splica cu e miembronan di FARC ta den un proceso di demobilisacion.
“Esaki ta e prome paso pa futuro e organisacion aki por wordo reconoci como partido of movimiento politico cu personeria huridico, posterior na e dehacion di arma,” e comunicado a bisa.
E grupo politico a designa tres vocero pa Senado y tres pa Camara de Representantes. Ta ciudadanonan kendenan no ta permiti participa den discusionnan di Congreso riba reformanan legal na e implementacion di e acuerdo final.
Ta suspende 5 hefe guerillero
Diaranson, e Estado Mayor Central di FARC a comunica cu nan a expulsa cinco lider di nan rango door di a opone na e proceso di paz.
Den un comunicado, e guerilla a bisa cu a tuma “e decision di separa di e filanan Gentil Duarte, Euclides Mora, John Cuarenta, Giovanny Chuspas y Julian Cholo, kendenan te cu algun dia pasa a cumpli tareanan di mando den e organisacion. E decision aki ta motiva den su conducta reciente cu a hiba na drenta den contradiccion cu nos liña politico-militar.”
“Nos patria ta pasa pa un momento crucial den su historia. E caminda di paz ta habri mey mey di inmenso dificultadnan contra boluntad di e sectornan mas reaccionario di nos pais, no mester wordo obstaculisa pa un grupo di insensato cu ta desconoce e anhelonan di paz di e inmensa mayoria di nos pueblo, ta lansa pa ambicion personal, disfrasando nan innobel propositonan tras fraseologia di apariencia revolucionario,” nan a añadi.
Fuente: CNN en Español