BOSTON, Massachusetts – Un mucha homber di Massachusetts kende a bira viral mas na principio di aña, despues cu blog di su mayornan a pone un luz riba e problema di salud di e chikito – e tabata tin mas di 10 operacion, incluyendo un transplante di curason – a fayece diabierna, su famia a anuncia riba nan pagina di Facebook.
“Ari a fayece pacificamente awe tardi, scuchando e wega di Red Sox,” famia di Ari “Danger” Schultsz a skirbi riba nan pagina di Facebook.
E noticia tragico a bin un dia despues cu mayornan di Ari, Mike y Erica Schultsz a skirbi riba nan pagina di Facebook y blog, “Echo of Hope”, cu Ari a drenta Boston Children’s Hospital, den e departamento di emergencia y a wordo poni riba mashin.
“Nos a yama 911 pa 4’or y 19 di marduga, ora cu Ari a haya un atake,” nan a skirbi diahuebs mainta. “Hopi espantoso. Na hospital awor aki. Algo ta pasando. Nos no sa kico.”
Algun ora despues, e situacion e empeora. “Un tiki despues di 10’or di mainta, Ari a drenta den e departamento di emergencia,” por a lesa riba e post subsecuente. “Tabata tin riba mey ora di CPR y a wordo poni riba mashin den e unidad cardiaco di Intensive care. For di awo p’adilanti ta desconoci.”
Ari a causa sensacion, en particularmente, na Juni, ora cu su mayornan a pone un video titula “Ari’s Going Home,” di nan yiu ora cu nan a haya sa cu despues di 189 dia como un mucha impaciente, 105 dia despues di a haci un transplante di curason dia 3 di Maart, y 86 dia desde cu e tabata tin paro cardiaco, e por a bay cas dentro di dos dia.
Ari, den un video, bisti cu un jersey di Boston Red Sox y ta bat cu un bate di baseball, tabata contento di por a haya sa cu na luga di warda simannan largo pa por bay cas, tabata solamente algun dia cu a falta. Ora cu su tata a recorde con largo el a keda den hospital, Ari a exclama, “189 dia? Esey ta dimas!”
Ora cu su tata a puntre kico e lo kier haci despues cu e bay cas, Ari a bisa, “Por ta bay na un veld di bala… Y despues, bay den cura patras y practica mi swing di golf.”
Manera cu ABC news a reporta e momento eynan, salida di Ari for di Hospital tabata un regalo perfecto pa dia di Tata pa Mike Schultz, kende a hiba su yiu na un cancha di golf.
Den un video cu famianan di Ari a saca e mesun dia, cu el a wordo hiba hospital, catcher di Red Sox Christan Vasquez y shortstop, Xander Bogaerts, a pasa laga regalo y invita Ari pa tira e prome pitch durante un wega di Red Sox riba dia 27 di Augustus.
Awo, Ari ta den shelo y lo keda disfruta di e weganan unda cu e no lo tin dolor, ni preocupacion, sino lo ta un mucha homber contento y feliz. RIP Ari Schultsz.
Fuente: http://abcnews.go.com