CARACAS, Venezuela- Areanan amplio di cero El Avila a wordo destrui door di candela den e parke natural caminda fuentenan di awa ta nace cual ta abastece Caracas cu awa, segun e agencia AFP.
“Desde 6 or di atardi e candela a cuminsa den e sector Galindo del Waraira Repano (cero Avila), cu te cu awo a destrui 50 hectarnan”, e minister di interior, Nestor Reverol a informa den declaracionnan na televisionnan gubernamental.
E parke, caminda cu’n gran variedad di especie ta habita, hopi biaha ta escenario di candelanan forestal, specialmente den e epoca di secura.
Mas di 100 efectivo a sumanan mes na labornan pa paga e candela, Reverol a agrega, destacando cu diamars den oranan trempan lo lansa awa for di un helicopter di Guardia Nacional.
E minister di Ecosocialismo, Heryck Rangel, a sigura cu a logra contene “e avance di e cabes di e candela”.
Segun e funcionario, “tur cos ta indica cu e candela tabata intencional” cometi door di “enemigonan di patria”, cual el a acusa di a ocasiona e candelanan forestal den e parkenan nacional.