Crea e organisacion Family Justice Center ta algo cu ta tuma su tempo. Ta hopi instancia a participa den e reunionnan cu a tuma luga un siman largo y cu na final a haci diferente palabracion. Un total di 14 instancia a participa cu 23 representante.
Glenda Hernandes, directora di Departamento di Asuntonan Social, a participa activamente den e encuentronan aki. Contrario na e situacion existente te cu recientemente, henter e proceso di ayudo ta tuma luga na un punto. E ta mas accesibel pa un victima cu no mester bay hospital, polis, trahado social, etc. Ta haci e situacion mas comodo pa e victima.
E reto pa atende cu violencia fisico y abuso sexual na Aruba ta grandi. E ayudo te awo tabata fragmenta y laat, segun Hernandes. Door di traha hunto y cu ayudo di un medico forensico, kier logra acumula mas evidencia y mas lihe posibel pa por logra yega na un proceso penal exitoso tambe.
E cooperacion mas estrecho aki entre instancianan ta masha importante mirando e cifranan alarmante. Si el a bisa cu e cambionan no ta sosode lihe, pasobra mester spera tur hende, inclusive e comunidad, compronde e importancia di un Family Justice Center.
Sociaal Psychiatrische Dienst a ricibi un miyon for di Social Crisis Plan den 2020 y nan a atende 296 caso. Violencia, abuso fisico, abuso sexual y adiccion cu violencia tabatin di haber cu 140 di e casonan (47%) trata. Den 2020 tabatin 68 caso di abuso di mucha.
E no ta algo nobo, pero a drecha e proceso pa yega na un miho funcionamento den e cadena di ayudo.