CIUDAD DI GUATEMALA, Guatemala- Famianan a dicidi di actua nan mes, despues di cu autoridadnan Guatemalteco a suspende e operacionnan di buskeda, debi na e riesgo halto den e zona.
Famia di e personanan cu ta desapareci ainda despues di e erupcion tragico di e volcan Fuego, desde diahuebs ta yegando e comunidad San Miguel Los Lotes, cu e speransa di haya e restonan di nan sernan keri, AFP ta informa. Nan a dicidi di actua pa nan cuenta, ya cu diaranson, autoridadnan Guatemalteco a suspende e operacion di buskeda, debi cu e volcan ta sigui ta activo y ta provoca instabilidad di e tereno.
Famianan ta riesga nan bida ora di ignora e cintanan di siguridad y ta drenta den e zona di desaster. Pero esaki no ta stop nan. Uzando piek cu shovel nan ta purba di coba e capa di shinishi cu a cubri e localidad desola.
“Nos deber ta di hayanan”, Elder Vasquez, di 49 aña a splica. Vasquez hunto cu varios boluntario ta limpiando e as di e zona unda su cas tabata situa. “Pa bo famia bo ta duna bo mesun bida”.
E volcan Fuego a drenta den erupcion dia 3 di juni y a mata por lo menos 110 persona. Pero te ainda tin hopi persona cu ta desapareci. Otro 57 persona a resulta herida y 12407 a wordo evacua, segun dato di e Coordinadora Nacional pa e Reduccion di Desastrenan (Conred).F