Ariba Dia Internacional di Famia, dia 15 di mei, parlamentario drs. Mervin Wyatt-Ras kier para keto na e importancia di famia pa nos comunidad. Famia ta pilar di nos sociedad. Den famia un mucha ta haya tur instrumento pa desaroya su mes y transforma su mes den un adulto responsabel, independiente y integro.
E ta siña balor, normanan, structura y respet pa otro y su mes. Dor di amor den famia e ta siña duna amor, cariño y acepta tur hende. Den famia un mucha ta siña respeta derechonan humano. P’esey mes enseñanza tin cu bay man den man cu un bon educacion. En bista cu mayoria di mayornan di awendia ta traha ta necesario bon acogida for di tempran pa nos muchanan. Bon crechenan y bon Tra’i Merdia ta un sosten grandi pa e mayor di awendia. Alabes un entrada digno ta yuda mayornan pa provee pa nan yiunan. Gobierno anterior a yuda famianan specialmente esunnan mas vulnerabel den nos comunidad. A fortifica dicho famianan. A aumenta bijstand, a hisa salario minimo. A duna mayornan di menos entrada e asina yama “schoolkinderentoeslag” y a duna na esunnan cu ta gana menos di Afl. 2500,- “reparatietoeslag”. A aumenta tambe e bijstand pa esunnan cu ta special y a stimula pa nan por haya empleo pa por traha na inclusion di e grupo aki den comunidad. Di e forma aki esunnan vulnerabel por a avansa y esaki tabatin su refleho ariba resto di famia y comunidad. Gobierno anterior a presenta alabes e Ley di Creche cu a ser aproba unanimamente den Parlamento. Dor di e ley aki cu ta reglamenta e cuido di nos muchanan, mayornan lo por keda trankilo mientras nan ta traha paso nan yiunan lo haya bon cuido. Ademas a introduci Traimerdia y Traimerdia pa nos hobennan kitando nos muchanan y hobennan foi riba caya. Tambe a fortifica Sostenemi
Gobierno anterior alabes a reglamenta cuido di nos grandinan cu a ser aproba dor di mayoria den Parlamento. Asina nos famianan por ta mas trankil ora cu nan grandi mester drenta den un facilidad.
Tin cu menciona cu e aña aki Nacionnan Ini den cuadro di dia do famia lo enfoca ariba e di 16 meta di SDG’s (sustainable Developmental Goals, esta metanan di desaroyo sostenible. Meta 16 ta ensera promocion di sociedad inclusivo unda ta reina paz pa garantisa desaroyo sostenibel. Lo enfoca riba conscientisacion encuanto e rol di famianan y politica dirigi riba famia pa realisa un comunidad incluso. Wyatt-Ras ta haya esaki di importancia pa di asina elimina discriminacion di esunnan vulnerabel, banda di yuda nan financieramente. Durante e IPKO venidero na fin di mei lo trata e SDG’s. Parlamento a prepara pa cu esaki. Gobierno desde un par di aña ta bezig cu e 17 SDG’s y tin cu raporta y implementa cambio. Wyatt-Ras ta spera cu por yega na implementa mas cambionan.
E parlamentario ta finalisa felicitando tur famia aki na Aruba.