Famia Planea kier a para keto riba diferente metodonan anticonceptivo cu nan ta brinda y tambe e importancia pa por tuma accion y haci uzo di esakinan, segun Johnathan Trinidad, kende tambe ta forma parti di e fundacion.
Tin diferente metodo anticonceptivo, entre otro tin pildo y tambe hangua. Tin e pildo cu tur ser femenino por bebe tur dia y tambe tin pildo den e caso aki pa mamanan cu ta dunando pecho. Semper tin e opcion pa esnan cu ta mama caba, pa por proteha nan mes y aparte di esaki tin e parti di hangua, cual cu ta ofrece e inyeccion di tur luna. Despues di esaki e persona mester bay su dokter di cas pa inyecta esaki.
Aparte di esey, tin e hangua di cada pasa tres luna, cu e fundacion ta brinda eynan.
Tambe tin spiral pa personanan cu ya caba ta mama. Hopi importante pa menciona ta e parti di spiral y hangua ta importante pa e cliente of personanan cu ta interesa den esaki pa bin na e fundacion cu un receta di dokter pa asina ey nan por cumpra esaki of tambe haya esaki disponibel.
Mas cu claro tambe pa e mucha hombernan tin condom y esaki tambe ta brinda na comunidad pa un prijs hopi mas abao y mas cu claro tambe pa e ora ey por motiva nan cu e dobel uzo di proteccion ta hopi importante. E mucha muhe cu su pildo of hangua, pero tambe mucha homber den e caso aki pa condom.
A puntra Trinidad for di ki edad ta papia di dje, cu por haci uzo di e servicionan di e fundacion, pa asina adkiri e materialnan aki.
E edad ta varia hopi, pero manera a ser menciona, tin hopi hoben cu ta bin practicamente tur dia, tur siman, tur luna, cu no solamente ta bin pa busca informacion, pero tambe ta bin pa por wak ki opcion nan tin disponibel pa nan y mas cu claro tambe ta hopi importante pa menciona, cu hobennan ta haya esaki completamente gratis cu nan carchi di AZV te cu 21 aña di edad y tambe ta varia di edad, pasobra bo ta haya personanan riba 21 aña, tin ora riba 25 aña cu ta bin y tuma e accion pa por uza un metodo anticonceptivo.
Pa loke ta menornan di edad, Trinidad a splica cu en principio, ora cu e hobennan ta asina jong, ta purba di duna mas tanto guia y sosten cu ta posibel na nan. No solamente door di ofrece e metodo anticonceptivo pero door di papia cu nan, splica nan e importancia di e dobel proteccion y splica nan tambe cu den e ramo di edad ey, estudio semper mester keda na prome luga. Tambe e fundacion ta percura pa informa nan, ora ta bay cu nan no kier uza pildo of si kier uza un hangua, cu nan tin cu bin cu un recept di dokter, ya e ora ey e dokter tambe ta na altura cu na un edad hoben e mucha muhe ta bay cuminsa uza un metodo anticonceptivo.
Den e caso aki e no por haya ok di e dokter. Si e dokter stempel y firma e recept si tur cos ta bon, nan tin un buki di receta di Famia Planea, ta yena e informacion di e pashent, e hoben por bin cun’e na e fundacion.
Trinidad a sigui splica cu tin varios caso cu tin hoben toch ta bin cu e receta y no ta den tur caso e dokter a juist yama mayor of contact mayor. E por ta cu e confiansa entre e hoben cu e dokter ta bon, cu e dokter ya caba ta provee esaki.