Tabata diabierna atardi 9 di juli, na Papiamento Restaurant den un ambiente ideal, cu solo bahando, biento fresco suplando despues cu un poco awacero a cay riba Aruba, cu famia Ling hunto cu un grupo chikito di invitado a reuni pa lansa e buki; LING LEGACY A JOURNEY OF FAMILY, FOOD AND ONE HAPPY ISLAND.
Sharlene Starke, yiu muher di Yolanda Ling q.e.p.d. a conta di e origen di e buki y di e fundacion; Jordan Ling Foundation na cual tur fondo recauda por medio di benta di e buki lo bay.
“E idea pa scirbi y publica e buki a nace cerca mi tanta Sra. Ingrid Ling casa di mi tio Clifton. E intencion tawata prome pa haci’e un publicacion priva pa famia, pa e keda como un recuerdo pa tur miembro di famia cu ta of tabata parti di e legado di e famia Ling, pues un family book,” asina Sharlene a conta.
Sinembargo na 2015 mientras cu Sra. Ingrid tawata bezig cu e draft, e famia a ser enfrenta cu un dolor devastador. Su primo Jordan, yiu di Clifton y Ingrid lamentablemente a tuma su mesun bida a consequencia di su sufrimento di deficiencia mental. Asina na 2016 a lanta“The Jordan Ling Foundation” pa promove actividadnan relaciona cu Salud Mental. E meta principal ta pa yuda mas tanto possible promove cuido di personanan cu ta sufri di Salud Mental aki na Aruba.
Despues Sr. Clifton Ling kende hunto cu su rumanan a tuma over e negoshi di su mayornan a conta di e historia di yegada di su famia for di China na Aruba na 1930. Tawata durante di e decada 1920 cu China tawata un republica nobo, despues di 2000 aña di dominio imperial. E pais tawata enfrentando enorme retonan cu nan economia, politica y bida social. China a keda devasta pa un guerra civil entre Kum Ming Tong (KMT)encabesa pa Chang Kai Shek y e Partido comunista Chines (CCP) bow mando di Mao Zhe Dong, cual doctrina a prevalence te cu awe.
Segun e censo di e tempo ei, China tawata conta cu un poblacion di solamente mei miyon abitante. Den e decada ey China a conoce un periodo di hambruna causa pa caos politico y un secura immenso. “Mi Papa a nace den e aldea chikito di Leelong cu awe ta un bario di e metropolis Shenzhen, e ciudad fronterizo entre Hong Kong y China. Siendo e yiu mayor di un famia di 10 yiu e tawata esun cu a wordu encarga pa haci e biahe pa exterior cu e speranza pa un logra miho futuro, asina el a descubri Aruba.
Sr. Clifton Ling a sigui conta durante di su discurso cu e caminda pa realisa e buki tawata basta turbulent pa motibo di e tragedia di nan yiu homber menor Jordan, na kende nan ta dedica e obra di e buki y tambe pa e fundacion bow su nomber.
Un danki ta bay na nan yiu homber Dustin y su grupo di amistad di Caribe Hulandes biba na New York – Big Apple cu a establece contacto cu e editor y publicist Willy Wong cu tabata tin gran conocimento di e material y acceso na e archivonan universitario den e region. Asina por a compila e historia di e Ling grandinan, e biahe, e documentonan y potretnan cu ta sincroniza cu e texto skirbi den e buki. E ta simplemente un storia di un imigrante cu kier a busca su futuro sin conocemento kico esaki lo trece den un mundo nobo aki na otro banda di e laman immenso.
Un danki special ta bay na tur personanan y instancianan cu a contribui den cualkier forma cu por a conduci den e logro aki awe. E buki ta dedica na JLF y e fondonan recauda aki ta bay pa e fundacion. E prome ehemplar di e buki a ser entrega na director di Archivo Nacional Sr. Raymond Hernandez. E bukinan lo ta obtenibel den librerianan local. E famia ta spera cu e comunidad di Aruba les’e y goza di dje!