Internacional: Entre 200 pa 300 Israeli a congrega diabierna dilanti di e tent instala cerca di Kneset (Parlamento), caminda cu famia di esunnan asesina y secuestra di dia 7 di october a tene vigila, den un acto di protesta pa exigi cabes di e prome minister, Benjamin Netanyahu, segun The Times of Israel.
“Famia di esunnan asesina p’e destitucion di Netanyahu,” segun texto di un borchi cu tabatin n’e tent.
E protestanan ta tuma luga despues di un supuesto intento di cende candela durante e anochi di instalacion, caminda varios persona a drumi. E organisacionnan di e manifestacion a detaya cu e autoridadnan ta investigando e incidente cu a pone e tent cu tur autorisacion necesario di e compania di coriente. Den cuadro di e evento, Ronni Neeman, tanta di Rotem, asesina p’e militantenan di Hamas den e festival di musica Supernova dia 7 di october, a insisti pa e gobierno baha completo.
“Con por ta posibel cu e prome minister no a demiti, cu bao su mando a asesina y a tuma como rehen e mayor cantidad di Israeli?”, Neeman a puntra, acusando Netanyahu di “sigui sembra division” entre e ciudadania. Prome cu comienso di e guera cu Hamas, Netanyahu lo a enfrenta varios luna di protesta pa su reforma polemico hudicial cu el a otorga n’e gobierno un influencia decisivo den e seleccion di hues, limitando e alcance di corte supremo pa deroga ley of veredicto contra di e ehecutivo.