TACHIRA, Venezuela – Dos supuesto acto di canibalismo lo a wordo registra den e “Cuartel de Prisiones de la Policia de Tachira” (Politachira) durante un rebelion cu a dura 29 dia.
Kennedy Correa y Luz Marina Sepúlveda a conta cu nan yiu Anthony Kelvis Correa Sepulveda a wordo asesina y desmembra pa e prezonan mientras cu tabata tin e conflicto carcelario. Nan no a ricibi informacion di parti di autoridadnan.
Juan Herrera tabata cera pa hortamento di auto y tabata spera e realisacion di e audiencia preliminar. Su tata, Carlos Herrera a informa cu e hoben tabata tin e mesun tragico destino di Correa Sepulveda.
“Mi a papia cu un di nan cu a sali den libertad y nan tabata banda di mi yiu ora cu nan a cuminsa haci esaki. Nan a cortanan na pida y a duna e detenidonan pa nan come,” el a relata.
El a responsabilisa e prezo Dorangel Vargas, conoci como “comegente”, di desmembra e curpa di su yiu. “Mi a stop di scucha e voz di mi yiu diabierna pa 11’or y mey di anochi y loke nan a bisami ta cu diasabra, cuminsando pa 1’or di mainta, nan a lanta contra mas di 40 prezo. Nan a hink’e, colg’e pa e desangra y nan a yama Dorangel pa e cuminsa na descuartis’e y asina haci cu e otro hoben. E dolor ta cu mi no tin nada pa haci un entiero,” el a relata.
Herrara a conta cu durante e tempo cu su yiu tabata prezo, e tabata victima di extorsion di parti di efectivonan policial. Nan a cobr’e 200 mil Bolivar pa nan mand’e pa un cell di menor peligrosidad y impedi su traslado pa un otro prizon. E homber a pidi pa nan entreg’e e restonan di su yiu pa sigui cu e entiero.
For di comienso di e rebelion y hasta su culminacion no tabata tin respuesta di parti di e minister di asuntonan penitenciario, Iris Varela.